د دید خبري اژانس: د طالبانو ویاند ذبیح الله مجاهد د “جوړو د جلا کېدو” په اړه د نویو مقرراتو په وړاندې د اعتراضونو په ځواب کې وویل چې د “اسلامي قوانینو” سره د ځینو خلکو مخالفت کومه نوې مسله نه ده او د هغه په وینا، دې نیوکو ته باید پام ونه شي. هغه ټینګار وکړ چې د طالبانو لخوا نافذ شوي قوانین “د شریعت سره مخالف ندي” او هغه کسان چې “اسلامي قوانین مني باید اندیښنه ونلري”.
د حنفي فقهې اصولو ته په اشارې سره، مجاهد وویل چې پلار او نیکه، که چیرې دوی اړین شرایط پوره کړي، د کوچنیو ماشومانو د سرپرستۍ حق لري او دا حکم د “محکمو د پریکړې کولو اسانتیا” لپاره دی.
هغه زیاته کړه چې “د دوی له رضایت پرته د نجونو واده کول منع دي” او ادعا یې وکړه چې تیر کال په محکمو او اړوندو ادارو کې د جبري واده پورې اړوند زرګونه قضیې ته رسېدنه شوې دي.
دا څرګندونې په داسې وخت کې راځي چې د بشري حقونو سازمانونه پر طالبانو تور لګوي چې د ښځو حقونه یې په سختۍ سره محدود کړي، د ملاتړ میکانیزمونه یې له منځه وړي او عدالت ته د ښځو د لاسرسي په وړاندې پراخ خنډونه رامینځته کړي دي.