د دید خبري اژانس: په ترکیه کې میشته یوه افغانه زده کوونکې د ۲۴ ساعتونو لپاره د ازمیر ښارواله وټاکل شوه.
مهناز یولماز، چې په ترکیه کې میشته یوه افغانه زده کوونکې ده، د ازمیر په ښار کې په یوه تعلیمي او سمبولیک پروګرام کې د ۲۴ ساعتونو لپاره د ښاروالې دنده په غاړه واخیسته.
دا پروګرام د ماشومانو د نړیوالې ورځې (اپریل ۲۳) په مناسبت ترسره شو او موخه یې د ماشومانو د مدیریت رولونو سره اشنا کول او د دوی ټولنیز ګډون پیاوړی کول دي.
مهناز، چې څو کاله مخکي له خپلې کورنۍ سره د جوزجان ولایت څخه ترکیې ته کډواله شوې وه، د خپلو وړتیاوو او زده کونکو ترمنځ د تعلیمي فعالیتونو له امله د ترکیې د ازمیر ښارواله وټاکل شوه.
پداسې حال کې چې په ځینو هیوادونو کې د ماشومانو د مهارتونو د پراختیا لپاره داسې فرصتونه چمتو کیږي، په افغانستان کې تعلیمي محدودیتونه دوام لري.
د طالبانو له واک ته رسیدو وروسته او د دې ډلې د ایډیالوژیکي سختو اقداماتو له امله، په افغانستان کې د شپږم ټولګي څخه پورته د نجونو لپاره تعلیم بند شوی، او په ملیونونو نجونې د ثانوي او لوړو زده کړو په کچه د زده کړې له دوام څخه محرومې شوې دي. افغانستان په نړۍ کې یوازینی هیواد دی چې په دې کچو کې یې د نجونو لپاره رسمي تعلیم بند کړی دی.
ملګرو ملتونو خبرداری ورکړی چې د دې پالیسیو دوام نه یوازې د ښځو تعلیمي راتلونکي ګواښوي، بلکې د هیواد د روغتیا سیسټم، د کار بازار او ټولنیز پرمختګ پروسې لپاره ژورې او اوږدمهاله پایلې هم لرلی شي.