د دید خبري اژانس: د فواید عامې وزارت اعلان وکړ چې د طبیعي پیښو له امله تړل شوې څو لویې لارې او مخابراتي لارې د ترافیکو پر مخ پرانیستل شوې دي.
په څو ولایتونو کې د سیلابونو او ځمکې ښویېدو وروسته تړل شوې لویې لارې بیا پرانیستل شوې
د هیواد په ځینو ولایتونو کې د سختو بارانونو، سیلابونو، د واورې او ځمکې ښویېدو وروسته، یو شمیر مهمې لویې لارې او مخابراتي لارې په موقت ډول تړل شوې، چې د خلکو د تګ راتګ او د توکو د لیږد لپاره یې ستونزې رامینځته کړې.
د فواید عامې وزارت ویاند محمد اشرف حق شناس دا پیښې تایید کړې او ویلي یې دي چې د وزارت عملیاتي ټیمونه سمدلاسه اغیزمنو سیمو ته واستول شول او لارې یې پاکې کړې.
د هغه په وینا، دا ټیمونه، د تخنیکي تجهیزاتو او دوامداره هڅو په کارولو سره، وتوانیدل چې تړل شوي سړکونه له خټو، واورې او جغل څخه پاک کړي او بیا یې د موټرو تګ راتګ لپاره چمتو کړي.
هغه زیاته کړه چې اوس مهال، ټولې تړل شوې لویې لارې بیا پرانیستل شوې او د موټرو تګ راتګ بیرته عادي حالت ته راستون شوی، مګر د سړکونو د وضعیت دوامداره څارنه دوام لري ترڅو د نویو ستونزو په صورت کې سمدستي اقدامات وشي.
حق شناس همدارنګه ټینګار وکړ چې د فواید عامې وزارت، د نورو اړوندو ادارو سره همکارۍ، په راتلونکي کې د ورته پیښو سره د مقابلې لپاره بشپړ چمتووالی لري او هڅه کوي چې د ښه مدیریت او چټک غبرګون له لارې د لویو لارو د اوږدمهاله بندیدو مخه ونیسي.