د دید خبري اژانس: د امریکا د استازو په مجلس کې ډیموکراتانو د ډونالډ ټرمپ د استیضاح او لرې کولو لپاره ۱۳ نکاتي پلان وړاندې کړ، چې په کې د هغه پر وړاندې د “لوړو جرمونو او ناوړه کړنو” په ګډون جدي تورونه پورته شوي دي.
د دې پلان له مخې، ډیموکراټانو د متحده ایالاتو ولسمشر د جګړې پیل کولو، د وژنو امر ورکولو، د جنګي جرمونو ترسره کولو او د نړیوالو قوانینو څخه د سرغړونې په څیر کړنو تورن کړی دی. دا تورونه په داسې وخت کې پورته کیږي چې په واشنګټن کې سیاسي کړکیچونه په لوړه کچه پاتې دي.
د دې پلان د مسودې جوړونکو په وینا، د ټرمپ کړنو نه یوازې د امریکا ملي امنیت له خطر سره مخ کړی، بلکې په سیمه ایزه او نړیواله کچه یې هم بې ثباتي رامینځته کړې ده. دوی ټینګار کړی چې د استیضاح پروسې تعقیب د کانګرس د قانوني مسؤلیت یوه برخه ده چې لوړ پوړي چارواکي مسؤل وګڼي.
په مقابل کې، د ټرمپ ځینو سیاسي متحدینو دا اقدام “سیاسي او تعصب لرونکی” او د امریکا په سیاسي ډګر کې د هغه د دریځ د کمزوري کولو هڅه بللې ده.
دا لایحه به د امریکا سنا ته د لیږلو دمخه د استازو په جرګه کې په پام کې ونیول شي او رایه ورکړل شي، چیرې چې د ولسمشر د محکومولو یا برائت ورکولو په اړه وروستۍ پریکړه به وشي.