د دید خبري اژانس: په ملګرو ملتونو کې د پاکستان دایمي استازي اعلان وکړ چې د امنیت شورا د ۱۹۸۸ کال د بندیزونو رژیم د څارنې ټیم د واک د غځولو لپاره د امنیت شورا د پریکړه لیک تصویب د دې حکومت چارواکو ته یو واضح پیغام لیږي چې د افغانستان خاوره باید د کوم هیواد د ګواښلو یا برید لپاره ونه کارول شي.
د ۱۹۸۸ کال د طالبانو د بندیزونو کمیټې د څارنې ټیم د واک د غځولو په اړه د ملګرو ملتونو د امنیت شورا د نوي پریکړه لیک له تصویب وروسته، د پاکستان استازي عاصم افتخار احمد ټینګار وکړ: “اوس دا طالبان دي چې پریکړه وکړي چې دوی د افغانستان لپاره کومه لاره غوره کوي؛ د انزوا لاره یا د سولې او سوکالۍ لاره.”
د پریکړه لیک د احکامو په بشپړ ډول پلي کولو اهمیت ته په اشارې سره، هغه زیاته کړه چې د څارنې ټیم د واک غځول د امنیت شورا د هوډ منعکس کوي چې په افغانستان کې د وضعیت څارنه دوام ورکړي او د نړیوالو مکلفیتونو سره د طالبانو اطاعت ډاډمن کړي.
د پاکستان استازي دا هیله هم څرګنده کړه چې د څارنې ټیم به د امنیت شورا لخوا ورکړل شوي ماموریت په چوکاټ کې د خپلو کلکو هڅو او فعال راپور ورکولو له لارې د ۱۹۸۸ کال د بندیزونو کمیټې د کار ملاتړ وکړي.
د ۱۹۸۸ کال د امنیت شورا د بندیزونو رژیم په ځانګړي ډول هغه اشخاص او ادارې په نښه کوي چې له طالبانو سره تړاو لري او موخه یې د دې ډلې د فعالیتونو له امله رامینځته شوي امنیتي ګواښونو سره مبارزه ده. د څارنې ټیم د ماموریت غځول په داسې وخت کې راځي چې نړیواله ټولنه په افغانستان کې د امنیتي وضعیت او د طالبانو د حکومت د نړیوالو مکلفیتونو په اړه اندیښنې څرګندوي.