پاکستاني چارواکي: د اسلام آباد د چاودنې عامل افغان نه و
د دید خبري اژانس: د پاکستان د کورنیو چارو مرستیال وزیر اعلان وکړ چې په اسلام آباد کې د شیعه ګانو په جومات کې د ځانمرګي برید عامل افغان نه و، بلکې پخوا یې څو ځله افغانستان ته سفر کړی وو.
د تحقیقاتو لومړنیو پایلو ته په اشارې سره، د پاکستان د کورنیو چارو مرستیال وزیر طلال چودري وویل چې ځانمرګی بریدګر افغان تابعیت نه درلود، که څه هم هغه په تیرو وختونو کې افغانستان ته سفر کړی و. هغه زیاته کړه چې د روانو تحقیقاتو له امله، دا مهال د نورو جزیاتو خپرول ممکن نه دي او د پیښې مفصل راپور به په راتلونکو ۷۲ ساعتونو کې خپور شي.
چاودنه د جمعې د لمانځه پر مهال په اسلام آباد کې د شیعه ګانو په یوه جومات کې وشوه، چې لږترلږه ۳۱ کسان یې ووژل او ۱۶۹ نور یې ټپیان کړل.
چودري یو ځل بیا هند د ترهګرۍ په ملاتړ تورن کړ او ویې ویل چې اسلام آباد د دې مسلې په اړه اسناد له نړیوالې ټولنې او ګاونډیو هیوادونو سره شریک کړي دي. د هغه په وینا، پاکستان داسې شواهد لري چې ښیي هند د ترهګرو ډلو په ملاتړ کې خپله پانګونه درې چنده کړې ده.
د پاکستان د کورنیو چارو مرستیال وزیر ټینګار وکړ چې بریدونه دیني انګېزه نه لري او عاملین یې د پیسو لپاره تاوتریخوالی کوي. هغه زیاته کړه چې د بلوچستان د آزادۍ پوځ، تحریک طالبان پاکستان او نورو په څیر ډلې د پیسو په بدل کې فعالیت کوي.
هغه دا هم ادعا وکړه چې اسلام آباد په وار وار له افغان طالبانو څخه غوښتي چې ترهګرو ته پناه ورنکړي او د هند وسیلې نه شي، او خبرداری یې ورکړ چې دا نیابتي ډلې به د تیر کال په می میاشت کې د هند سره د ورته برخلیک سره مخ شي.
مخکې له دې، د پاکستان د دفاع وزیر خواجه اصف هم ویلي وو چې ځانمرګی بریدګر افغانستان ته سفر کړی و او د هند او طالبانو ترمنځ د اړیکو او همکارۍ نښې نښانې شتون لري.