په بدخشان کې د چینايي اتباعو پر ضد د بریدونو تر شا شبکې ته امنیتي ګوزار
د دید خبري اژانس: د طالبانو د حکومت امنیتي سرچینو په بدخشان ولایت کې د دې ډلې د ځانګړو ځواکونو لخوا د شپې عملیاتو راپور ورکړ، چې په ترڅ کې یې د تاجیکستان پولې ته نږدې د چینايي اتباعو پر ضد په بریدونو کې د لاس لرلو شکمن کسانو یو پناه ځای په نښه شو او یو مطلوب کس ونیول شو.
د طالبانو د حکومت د امنیتي سرچینو په وینا، دا عملیات تیره شپه د طالبانو د ځانګړو ځواکونو لخوا د بدخشان ولایت په فیض آباد ښار کې ترسره شول. د طالبانو حکومت ته نږدې رسنیو اعلان وکړ چې د عملیاتو هدف هغه پناه ځای و چې پکې د چینايي اتباعو پر ضد په وروستیو بریدونو کې یو شمیر ښکیل کسان شتون درلود.
د ترلاسه شویو معلوماتو له مخې، د طالبانو ځانګړي ځواکونه وتوانیدل چې د عملیاتو په جریان کې یو مطلوب کس ونیسي. له هغه څخه د پام وړ اندازه وسلې او پوځي مهمات هم کشف او ضبط شول.
سرچینو زیاته کړه چې د نیول شوي کس لومړنۍ پلټنې او اعترافونه ښیي چې د چینايي اتباعو پر ضد برید له افغانستان څخه بهر پلان شوی او لارښوونه شوی و. د دې سرچینو په وینا، په دې برخه کې اضافي څیړنې روانې دي او وروستۍ پایلې به یې په مناسب وخت کې له رسنیو سره شریکې شي.