د دید خبري اژانس: د افغان سرې میاشتې ټولنې اعلان کړی چې په ټول هیواد کې یې شاوخوا ۳۰۰۰ زده کونکي په یوه پراخه روزنیز پروګرام کې روزلي دي.
د افغان سرې میاشتې ټولنې اعلان کړی چې په ټول هیواد کې یې نږدې ۳۰۰۰ ځوانان روزلي دي. د دې ادارې د چارواکو په وینا، ۲۹۶۰ زده کونکو د سرې میاشتې سره تړلو ۳۷ روزنیزو مرکزونو کې مختلفې روزنې ترلاسه کړې دي.
په دې روزنو کې د ژغورنې اساسي مهارتونه، لومړنۍ مرستې، د طبیعي پیښو لپاره چمتووالی، او ځینې تخنیکي او ټولنیز مهارتونه شامل وو، چې د ځوانانو د عملي پوهې او عمومي پوهاوي د کچې د لوړولو په هدف ترسره شوي وو.
همدارنګه، د خپرو شویو معلوماتو له مخې، د دې زده کونکو څخه ۷۰ تنه د روزنیزو کورسونو له بشپړولو وروسته د افغان سرې میاشتې لخوا استخدام شوي او اوس د دې ادارې په مختلفو څانګو کې کار کوي.
د دې ادارې چارواکي وايي چې تعلیمي او د ځوانانو د ګمارنې پروګرامونه د هیواد د بشري اړتیاوو په ځواب کې د ځوان نسل د وړتیا د پیاوړتیا او اغیزمنې کارونې د ستراتیژۍ یوه برخه ده.