ازبک شرکتونو ته له افغانستان څخه د تیلو او ګازو استخراج لپاره جوازونه ورکړل شول
د دید خبري اژانس: د ازبک رسنیو د راپورونو له مخې، سرپرست حکومت ازبک شرکتونو ته د تیلو او ګازو سرچینو د سپړلو او استخراج لپاره جوازونه ورکړي دي.
ازبک شرکتونو ته له افغانستان څخه د تیلو او ګازو د استخراج لپاره جوازونه ورکړل شول
د ازبکستان د انرژۍ وزیر ژورابیک میرزا محمودوف زیاته کړه: سرپرست حکومت ازبک شرکتونو ته د هایدروکاربن سرچینو (تیلو او ګازو) د سپړلو او استخراج لپاره جوازونه ورکړي دي.
د ازبکستان د انرژۍ وزیر په وینا، په افغانستان کې د طوطي-میدان ګازو په ساحه کې رسمي عملیات د سپتمبر په ۱۴مه پیل شول، او ټاکل شوې ده چې ازبک شرکت د ۲۵ کلونو لپاره دا پروژه پلي کړي.
میرزا محمودوف ټینګار وکړ چې دا د پروژې یوازې لومړۍ مرحله ده او که بریالی شي، د استخراج کار به هم نویو بلاکونو ته وغځول شي.
هغه په افغانستان کې د ثبات اهمیت هم په ګوته کړ او ویې ویل، “که په افغانستان کې سوله ټینګه شي، اقتصاد او زیربنا به وده وکړي، او د دې هیواد خاوره به زموږ سمندرونو ته ترټولو لنډه لاره وي.”
د ازبکستان د انرژۍ وزیر زیاته کړه چې دا پروژه نه یوازې د افغانستان او ازبکستان دواړو په ګټه ده، بلکې کولی شي د سیمه ییزې پراختیا بهیر هم ګړندی کړي.
هغه د سیمه ییزې همکارۍ لپاره د اساس په برابرولو کې د سرپرست حکومت رول هم مهم وګاڼه او هیله یې څرګنده کړه چې د دوامداره ثبات سره به د دواړو هیوادونو ترمنځ پراخه همکاري پیل شي.