په لکی مروت کې د پاکستاني پوځ عملیات؛ د تحریک طالبان پاکستان ۱۷ غړي ووژل شول

د دید خبري اژانس: د پاکستان پوځ اعلان وکړ چې د خیبر پښتونخوا ایالت په لکی مروت سیمه کې د شپې د استخباراتي عملیاتو په ترڅ کې د تحریک طالبان پاکستان ډلې ۱۷ غړي ووژل شول.

د ډان ورځپاڼې په وینا، د پاکستان د پوځ عامه اړیکو (ISPR) نن، د شنبې په ورځ، د میزان په ۵مه، یو بیان خپور کړ، چې اعلان یې وکړ چې دا عملیات د جمعې له شپې څخه تر شنبې سهار پورې د “فتنه الخوارج” په نوم د عناصرو د شتون په اړه د مفصلو معلوماتو پر بنسټ ترسره شول.

په بیان کې ویل شوي چې امنیتي ځواکونو د اورپکو ځایونه په نښه کړل او د ډلې ۱۷ غړي یې ووژل، چې د پاکستاني چارواکو په وینا، “د هند په ملاتړ” یې فعالیت کاوه.

پوځ د پام وړ وسلو او مهماتو کشف هم اعلان کړ چې پخوا د امنیتي ځواکونو، پولیسو او ملکي وګړو په وړاندې په بریدونو کې کارول شوي وو.

د پاکستان د پوځ په وینا، په سیمه کې تصفیوي عملیات لا هم روان دي او هدف یې “په بشپړه توګه د ترهګرو عناصرو له منځه وړل” دي. ISPR د امنیتي ځواکونو د ژمنې په ټینګار سره پای ته ورساوه چې له هیواد څخه په بشپړه توګه ترهګري له منځه یوسي.

دا عملیات په داسې وخت کې ترسره کیږي چې پاکستان په وروستیو میاشتو کې د ترهګریزو بریدونو له زیاتوالي سره مخ دی، په ځانګړې توګه په خیبر پښتونخوا او بلوچستان کې. د ۲۰۲۲ کال په نومبر کې د اوربند له لغوه کیدو وروسته، تحریک طالبان پاکستان (TTP) په مکرر ډول د هیواد په امنیتي ځواکونو باندې خپل بریدونه زیات کړي دي.