له پاکستان څخه جرمني ته د افغان کډوالو د لېږدولو عاجله غوښتنه
د دید خبري اژانس: په پاکستان کې د افغان کډوالو د وضعیت په اړه د اندیښنو له زیاتېدو وروسته، د بشري حقونو څو سازمانونو د جرمني حکومت ته یو رسمي لیک واستاوه چې له ۲۰۰۰ څخه زیاتو کډوالو ته یې په چټکۍ سره هېواد ته د لېږدولو غوښتنه وکړه.
له پاکستان څخه جرمني ته د افغان کډوالو د لېږدولو عاجله غوښتنه
د بشري حقونو ګڼو سازمانونو او د کډوالو د حقونو مدافعینو د جرمني د بهرنیو چارو او کورنیو چارو وزیرانو ته په یوه لیک کې د دغه هېواد له حکومت څخه وغوښتل چې ژر تر ژره له پاکستان څخه د ۲۰۰۰ څخه زیاتو افغان کډوالو خوندي لېږد اسانه کړي.
په لیک کې راغلي چې جرمني باید د پاکستان له حکومت او مدني ټولنې سازمانونو سره خپله همکاري زیاته کړي ترڅو دا پروسه په خوندي او چټکه توګه ترسره شي.
دا غوښتنه په داسې حال کې وشوه چې د جرمني د کورنیو چارو وزیر مخکې اعلان کړی و چې د امنیتي ننګونو له امله د افغان کډوالو سمدستي لېږد ممکن نه دی؛ هغه څرګندونې چې د بشري حقونو سازمانونو له منفي غبرګون سره مخ شوې دي.
هغه سازمانونو چې دا لیک لاسلیک کړی خبرداری ورکړی چې په دې پروسه کې ځنډ کولی شي د سلګونو هغو خلکو ژوند له خطر سره مخ کړي چې د توقیف یا له پاکستان څخه د شړلو له خطر سره مخ دي.