اطلاعاتو ته د لاسرسي کمېسیون، اطلاعاتو ته د لاسرسي آنلاین سیستم، د اطلاع رسونې په برخه کې اسانتیاوې برابرو ل لپاره رسماً پرانیسته.
اطلاعاتو ته د لاسرسي کمېسیون، اطلاعاتو ته د لاسرسي آنلاین سیستم، د اطلاع رسونې په برخه کې اسانتیاوې برابرو ل لپاره رسماً پرانیسته.
د دید خبری آژانس په رپوټ، د حکومت د اطلاعاتو او رسنیو مرکز رییس، لطیف محمود، اطلاعاتو ته د لاسرسي کمېسیون له دې اقدام څخه هرکلی وکړ او ویې ویل: د دغه سیستم پرانیستنه، د اطلاع رسونې په برخه کې د کمېسیون لخوا څخه اساسی ګام دی.
هغه دې ته په ټینګار سره، چې له ۱۸ کلونو راپدېخوا، د بیان ازادۍ ښه وده کړې زیاته کړه، حکومت هڅه کوي چې د اطلاعاتو د ګردش په برخه کې اړینې اسانتیاوې برابرې کړي.
اطلاعاتو ته د لاسرسي کمېسیون رییس، عین الدین بهادري په دې ناسته کې چې د یاد کمېسیون لخوا د حکومت د اطلاعاتو او رسنیو په مرکز کې اطلاعاتو ته د لاسرسي انلاین سیستم د پرانیستلو په موخه جوړه شوې وه، وویل: د دې سیستم د رامنځته کېدو موخه، روڼتیا ته لاسرسی او د محرمیت فرهنګ پای ته رسول دي.
هغه ټینګار وکړ، چې د اطلاعاتو خوندیتوب او تلپاتې والی، له ټکنالوژۍ څخه ګټه اخیستنه، د ځواب ویلو د کچې زیاتول او اطلاعاتو ته د لاسرسي د رول په حرکت راستول؛ اطلاعاتو ته د لاسرسي انلاین سیستم د رامنځته کېدو له اساسي موخو څخه دي.
بهادري زیاته کړه، چې اطلاعاتو ته د لاسرسي انلاین سیستم، په یوه ثانیه کې د څه باندې ۴۰۰ غوښتنو د څېړنې وړتیا لري او د اطلاعاتو غوښتونکي کولای شي چې د انټرنټ لرلو په صورت کې د هېواد په هر ګوټ کې له دې سیستم څخه ګټه پورته کړي او له هرې ادارې څخه د اړتیا وړ اطلاعات تر لاسه کړي.
د افغانستان روڼتیا څار د څېړنو مسوول، عزت الله ادیب، اطلاعاتو ته لاسرسی بشري حق وباله او اطلاعاتو ته د لاسرسي د انلاین سیستم، پرانیستل یې په دې برخه کې د مهم او حیاتي ګام په توګه یاد کړ.
په همدې حال کې هغه اطلاعاتو ته د لاسرسي قانون د تطبیق په برخه کې له حکومت څخه د زیاتې همکارۍ غوښتنه وکړه.
د افغانستان د بشري حقونو د خپلواک کمېسیون مرستیال، نعیم نظري په دې ناسته کې وویل: اطلاعات د خلکو ملکیت دی او هغو ته د لاسرسي حق، د مهم بشري حقونو په توګه مطرح دی.
د پژواک خبري آژانس مسوول، دانش کړوخېل هم وویل، چې اطلاعاتو ته د لاسرسي انلاین سیستم په رامنځته کېدو سره، اوس هر ژورنالېست د هېواد له هر ګوټ څخه په اسانۍ سره له مسوولینو سره خپله پوښتنه شریکولی او خپل ځواب تر لاسه کولای شي.
