پاکستان: په بلوچستان کې د هند په ملاتړ د تحریک طالبان پاکستان ۵۰ غړي ووژل شول
د دید خبري اژانس: د بلوچستان په ژوب سیمه کې د پاکستاني امنیتي ځواکونو لخوا د څلورو ورځو عملیاتو کې د یاغي ډلو لږ تر لږه ۵۰ غړي ووژل شول.
پاکستاني رسنیو راپور ورکړ چې د بلوچستان د ژوب په سمبزه سیمه کې د اګست له ۷ څخه تر ۱۱ پورې د پراخو عملیاتو په ترڅ کې، د هیواد امنیتي ځواکونه د یاغي ډلو لږ تر لږه ۵۰ غړي په وژلو بریالي شول.
د دې رسنیو په وینا، د دې کسانو څخه ۴۷ د اګست له ۷ څخه تر ۹ پورې په عملیاتو کې او درې نور د اګست د ۱۰ او ۱۱ په عملیاتو کې ووژل شول.
رسمي سرچینو ادعا کړې چې دا کسان د هند د حکومت په ملاتړ په سیمه کې فعالیت کاوه.
له دې کسانو څخه د پام وړ اندازه وسلې، مهمات او چاودیدونکي توکي ترلاسه شوي دي.
د پاکستان پوځ اعلان کړی چې د پاتې یاغي غړو لټون روان دی.
په بلوچستان صوبه کې په وروستیو کلونو کې د افراطي ډلو لخوا په بریدونو کې زیاتوالی راغلی دی، او د ژوب سیمه د تحریک طالبان پاکستان (ټي ټي پي) د فعالیت یو له اصلي مرکزونو څخه ګڼل کیږي.