د دید خبري اژانس: په سټکهلم کې د افغانستان سفارت اعلان وکړ چې دوی د سویډن د مهاجرت ادارې سره یوې موافقې ته رسیدلي دي ترڅو په سویډن کې د سیاسي استوګنې، ټولنیز خوندیتوب یا د کار جواز لرونکو افغان کډوالو لپاره د سفر اسناد یا پاسپورټونه صادر کړي.
دا موافقه د سویډن د جنجالي پریکړې وروسته وشوه چې د ۲۰۲۵ کال د اکتوبر له لومړۍ نیټې څخه نوي شوي افغان پاسپورټونه نه مني.
د افغانستان سفارت وايي چې د مهاجرت ادارې د حقوقي څانګې له مشر سره په یوه رسمي غونډه کې د افغان کډوالو ټولنې اندیښنې راپورته شوې او د دوی د هویت او قانوني بحران د مخنیوي لپاره حل لارې چارې بحث شوې.
د سویډن د مهاجرت ادارې ډاډ ورکړی چې بدیل اسنادو ته د لیږد پروسه به په انساني او قانوني چلند سره ترسره شي.