دید خبرې آژانس: د اسلامی امارت د بهرنیو چارو وزارت سرپرست امیر خان متقي افغانستان لپاره د متحده عربي اماراتو او ایران له ځانګړو استازو سره جلا جلا کتنو کې د دوه اړخیزو اړیکو پر پياوړتیا او د سوداګرۍ او ټرانزیټي همکاریو پر پراختیا ټینګار کړی دی.
متقي د متحده عربي اماراتو له ځانګړي استازي سره کتنه کې د افغانستان او متحده عربي اماراتو اړیکې مثبتې بللي او هیله یې څرګنده کړې چې دغه هېواد ته یې په وروستي سفر کې د شویو هوکړو په پلي کېدو سره د دواړو هېوادونو سوداګریزې او ټرانزیټي اړیکې لا پیاوړې شي.
اميرخان متقي دغه راز د ایران د بهرنیو چارو وزارت له مرستیال، محمد رضا بهرامي سره د دوه اړخیزو اړیکو، د اوبو مسایلو او په ایران کې د افغان کډوالو د وضعیت په تړاو خبرې وکړې.
د روان لمریز کال له پیل راهیسې، د بهرنیو چارو وزارت سرپرست د پاکستان، قطر، جاپان او د ملګرو ملتونو د استازو په ګډون د بېلابېلو هېوادونو له استازو سره د همکاریو د پراختیا په موخه کتلي دي.
