دید خبرې آژانس: د اسلامي امارت رهبر د کوچني اختر د را رسېدو په مناسبت پېغام کې ویلي، اسلامي امارت له ټولو اسلامی هېوادونو سره د ورورۍ پر بنسټ اړیکې غواړي.
شیخ هبة الله اخندزاده له ټولو هېوادونو غوښتي چې د افغانستان د خلکو ارزښتونو ته درناوی وکړي او په خبره یې، ټولې خواوې باید د افغانستان په کورنیو چارو کې لاسوهنه ونه کړي.
هغه ویلي: « همدا راز غواړو له نورو هېوادونو سره په اسلامي اصولو ولاړې ښې او ګټورې اړیکې ولرو. له ټولو خواو غواړو چې د افغانستان د خلکو باور او ارزښتونو ته درناوی وکړي، زموږ په کورنیو چارو کې لاسوهنه ونه کړي او زموږ د ثبات، امنیت او پرمختګ مانع ونه ګرځي.»
شیخ هبة الله اخندزاده دغه پېغام کې زیاته کړې، چې یووالی د بریا راز دی او په خبره یې، ” راځئ د اسلامي نظام د دفاع په موخه خپل یووالی ټنیګ کړو.”
د اسلامي امارت رهبر ویلي، د اسلامي امارت محکمې باید د شریعت په رڼا کې پرېکړې وکړي او حدود پلي کړي او زیاته کړې یې ده چې “دا زموږ او ستاسو د جهادونو او قربانیو تر ټولو ستر هدف و.”
هغه له علماو غوښتي چې د منکراتو، ناسمو دودونو او بې ځایه لګښتونو د مخنیوي لپاره دې د ځوانانو د عقیدو پر سمولو، دغه برخه کې د اسلامي امارت د صادر شویو فرمانونو د پلي کولو او خلکو ته د امر بالمعروف او نهې عن المنکر قانون د تشریح کولو په برخه کې همکاري وکړي.
د اسلامي امارت رهبر دغه راز هېواد کې ښوونیزې ادارې هم د عقایدو اصلاح په برخه کې مکلفې بللي او له دې ادارو یې غوښتي چې ښوونیز نصاب دې له شریعت سره سم جوړ کړي.
د اسلامي امارت رهبر دغه پېغام کې پر فلسطینیانو د “صهیونیستي رژیم” بریدونه غندلي او دا یې ستر ظلم بللی دی.
هغه له اسلامي نړۍ غوښتي چې د فلسطین د خلکو ملاتړ وکړي څو په خبره یې، خپل غصب شوي حقوق ترلاسه کړي.
