دید خبرې آژانس: د چین هغه سیمې چې یخچالونه یا کنګل غرونه پکې دي، په تېرو شپږو لسیزو کې ۲۶ سلنې راکم شوي دي.
رویټرز خبري اژانس راپور ورکړی چې د چین یخچالي سیمې له ۱۹۶۰ کال راهیسې د چټک نړۍوال تودوخې له امله ۲۶ سلنې ویلې شوې دي.
هغه رسمي معلومات، چې د مارچ په میاشت کې خپاره شوي، ښيي چې شاوخوا ۷،۰۰۰ واړه یخچالونه بشپړ له منځه تللي او په وروستیو کلونو کې د یخچالونو ویلي کېدل نور هم زیات شوي دي.
د یونېسکو د راپور لمخې، په تېرو درېیو کلونو کې د نړۍ یخچالونه تر بل هر وخت چټک له منځه ځي.
د چین هغه سیمې چې کنګلغرونه یا یخچالونه پکې دي، لویدیځ او شمالي سیمې او د سیچوان، یونانان، ګانسو او چینګهای ولایتونه دي.
د چین د علومو اکاډمۍ د شماللویدیځ چاپېریال او سرچینو د ایکولوژیک انسټیټیوټ له لوري د مارچ پر ۲۱مه خپاره شوي معلومات ښيي چې په ۲۰۲۰ کال کې د چین هغه سیمه چې یخچالونه پکې دي، شاوخوا ۴۶،۰۰۰ مربع کیلومټره وه، چې شاوخوا ۶۹،۰۰۰ کنګلغرونه پکې وو.
دا په داسې حال کې ده چې د ۱۹۶۰ او ۱۹۸۰ کلونو ترمنځ د چین د یخچالونو ساحه شاوخوا ۵۹،۰۰۰ مربع کیلومټره وه او یواځې شاوخوا ۴۶،۰۰۰ کنګلغرونه پکې وو.
