د نري رنځ غلی ناورین؛ کندهار کې د یوې کورنۍ ۱۶ غړي روغتون کې بستر دي
دید خبرې آژانس: د کندهار د بې پولې ډاکټرانو د روغتون مسوولین وایي، کندهار او زابل کې له تېر کال راهیسې د نري رنځ ۲۷۰۰ مثبتي پېښي ثبت شوي دي.
د دوی په خبره، دغه پېښې د نري رنځ مرکزونو کې ثبت شوي او د ۸۵ هغو کسانو چې د نري رنځ په سختې بڼې اخته وو، درملنه یې کړې ده.
کندهار کې د بې پولو ډاکټرانو د روغتون استازي، ډاکټر صديق الله اسحاق و ویل: « له ۲۰۲۴ کال راهيسي مو کندهار او زابل کې د افغانستان د نري رنځ د ملي پروګرام په مرسته د ۴۵ زره شکمنو ناروغانو له ډلې ۲۷۰۰ مثبتې پېښې ثبت او درملنه مو ورته کړي او ترڅنګ يې د سېل د ۸۵ هغو ناروغانو درملنه هم ترسره شوې، چې د نري رنځ په سختې بڼې اخته وو.»
د غزني د اجرستان ولسوالۍ اوسېدونکی ظريف خان د خپلی کورنۍ له ۱۶ غړو سره په نري رنځ اخته شوی او د کندهار د بې پولو ډاکټرانو په روغتون کې تر درملنې لاندې دی.
ظریف خان ویلي: «زما لوڼې، زامن او مېرمن ټول په نري رنځ اخته شوي او اوس دلته يوو.»
ککړه هوا، په تنګو او تياره ځایونو کې د ډېرو کسانو استوګنه او د انسان د بدن د دفاعي سيسټم کمزورتیا له هغو لاملونو ګڼل کیږي چې له کبله یې نری رنځ چې یوه ساري ناروغي ده، په چټکۍ له یوه کسه نورو ته لېږدول کیږي.
دغه روغتون کې په نري رنځ اخته ډېری ناروغان ښځې او ماشومان دي.
په نري رنځ اخته، سهيلا وایي: «ټوخ مې وه، تبه مې وه، درمل يې راکړه اوس ښه يم.»
په نري رنځ د اخته ماشومې پلار، صورت خان و ویل: «ما مې خپل ناروغ د مرګ په حالت کې دغه روغتون ته راوړ خو اوس يې حالت د ښه کېدو په حال کې دی.»
د روغتيا نړۍوال سازمان د شمېرو لمخي افغانستان د نړۍ په کچه په هغو هېوادونو کې دی، چې په کلني ډول يې تر ۱۳ زره اوسېدونکې د نري رنځ له امله خپل ژوند له لاسه ورکوي.
