دید خبرې آژانس: د سرپل ولایت سیمه ییز مسوولین وايي چې دغه ولایت په بېلابېلو سیمو کې د ۳۳.۹۶ میلیونه امریکايي ډالرو په لګښت لسګونه ټولګټې پروژې پلې کېږي چې د یو شمېر پروژو چارې بشپړې شوې هم دي.
د سرپل د والي ویاند مولوي حبیب الله مسرور ویلي چې د بېلابېلو همکارو موسسو له لوري د ۳۳.۹۶ میلیونه امریکايي ډالرو په لګښت ۴۷ ټولګټې پروژې پلې کېږي چې د ۷.۱۹ میلیونه ډالرو په لګښت د یو شمېر پروژو چارې بشپړې شوې او پاتې نورې یې لا هم تر کار لاندې دي.
د نوموړي په وینا دغه پروژې د کرنې، اوبو لګولو، روغتیا، د ښوونځیو بیارغونې، د څښاک د پاکو اوبو د شبکو جوړولو، ښځو ته د کار زمینې برابرولو، د خوراکي توکو مرستې او پر مستحقینو د نغدو پیسو وېشلو په برخو کې پلې کېږي.
د نوموړي په وینا، د یادو پروژو له لارې د سرپل اوسېدونکو ته د زده کړې مناسب چاپېریال، د څښاک پاکې اوبه او د کار او کرنې زمینه برابرېږي.
هغه له همکارو موسسو وغوښتل، چې د سرپل ولایت په لرې پرتو سیمو کې د خلکو اړتیاوو ته په کتو نورې پروژې هم پلې کړي.
په ورته وخت کې د سیمې اوسېدونکو له دولتي مسوولینو او موسسو غوښتنه کړې، چې د دوی د اړتیاوو پر بنسټ دې ورته نورې پرمختیايي پروژې هم عملي شي.
