دید خبرې آژانس: د اسلامی امارت د بهرنیو چارو وزارت په بلوچستان کې د مسافرو پر رېلګاډي په وروستي برید کې د افغانستان د لاس لرلو په تړاو د پاکستان ادعا بې بنسټه بولي.
د بهرنیو چارو وزارت په یوه خبرپاڼه کې ټینکار کړی چې د بلوڅ وسله والې ډلې غړي په افغانستان کې حضور نه لري او له پاکستانه یې غوښتي چې له غیر مسؤلانه څرګندونو ډډه وکړي.
دغه وزارت همداراز د دې پېښې له امله د بې ګناه خلکو پر وژل کېدو خواشیني څرګنده کړې.
د بهرنیو چارو وزارت د عامه اړیکو مسوول، ضیا احمد تکل په دې اړه وايي: په بلوچستان ایالت کې پر مسافر وړونکي اورګاډي په تړاو د پاکستاني پوځ د ویاند هغه بې اساسه تورونه چې د پېښې تړاو له افغانستان سره لګوي په کلکو ټکو ردو او له پاکستاني لورو غواړو چې دا داسې نامسوولانه څرګندونو پر ځای خپل امنیت او کورنیو ستونزو ته پام واړوي.
دا په داسې حال کې ده چې د پاکستان د بهرنیو چارو وزارت د پنجشنبې په ورځ په یوه خبري کنفرانس کې وویل چې له بریدګر سره د برید پرمهال له افغانستان سره اړیکې لرلې.
شفقت علي د پاکستان د بهرنیو چارو وزارت ویاند له افغانستانه غوښتنه وکړه چې د دغه برید عاملان، مالي تمویلونکي او تنظیموونکي ونیسي او پوښتنې ګروېږنې ترې وکړي.
هغه زیاته کړه: «زموږ په تګلاره کې هېڅ بدلون نه دی راغلی، او حقیقتونه هم بدل شوي نه دي. هند د پاکستان پر وړاندې د ترهګرۍ ملاتړ کوي. هغه څه چې ما ورته اشاره وکړه، په دې برید کې ځانګړي وو. موږ داسې شواهد لرو چې د اړیکو جرړې یې افغانستان ته رسېږي.»
د سه شنبې په ورځ په بلوڅ بېلتون پالو پورې اړوند وسله والو په بلوچستان کې پر یوه مسافر وړونکي ریلګاډي برید وکړ او له ۴۰۰ زیات کسان یې برمته کړل.
تر دې پېښې وروسته، پاکستان وویل چې د دغه هېواد پوځ د عملیاتو په ترڅ کې ټول ۳۳ بریدګر وژلي دي.
