دید خبرې آژانس: د ا.ا د افغانستان د ټولګټو وزارت د اوسپنې پټلۍ مرستيال مولوي محمد اسحاق صاحبزاده د ازبکستان په رسمي بلنه ياد هېواد ته د ريلي همکاريو د پراختيا په موخه سفر وکړ.
له دغه وزارت څخه په خپره شوې خبرپاڼه کې راغلي چې نوموړي د سفر په لومړۍ ورځ د ازبکستان د اوسپنې پټلۍ ادارې له رئيس نرزلوف زفرغیاسویچ او د يادې ادارې له مرستیال حکمت اللّٰه رحمتوف او مل پلاوي سره کتلي.
سرچينې زياته کړې، چې په ياده کتنه کې د افغان لورې د ازبکستان له ريلي همکاريو څخه مننه کړې او ورپسې د حيرتان-مزارشريف د اوسپنيزې کرښې له لارې د سوداګريزو انتقالاتو او صادراتو د زياتوالي او د دوه اړخيزو ريلي همکاريو د پراختيا په تړاو مفصل بحثونه ترسره شوي دي.
د خبرپاڼې د مالوماتو له مخې د اوسپنې پټلۍ مرستيال د خپل رسمي سفر په ترڅ کې د ازبکستان د ټرانسپورت له وزير الهام محکموف سره هم کتلي دي.
په دغه کتنه کې دواړو لوريو د افغان-ټرانس پروژې د عملي چارو د پیلېدو پر څرنګوالي او د همږغۍ پر چټکوالي خبرې اترې کړې.
د يادونې وړ ده، چې ياد سفر د افغانستان او ازبکستان ترمنځ د دوه اړخيزو سوداګريزو او اقتصادي اړيکو د دوام او پراختيا په موخه ترسره شوی دی.
