اترا: د مخابراتو په برخه کې ۲.۸ میلیارده ډالر پانګونه شوې
دید خبرې آژانس: د اترا اداره وایي، چې په افغانستان کې د مخابراتو په برخه کې د دوه اعشاریه اته میلیارډ ډالرو په ارزښت پانګونه شوې ده.
اترا اداره د روشن مخابراتي شبکې د نوې انټرنېټي کڅوړې د معرفي کولو په پروګرام کې د مخابراتو په سکټور کې د افغانستان اړتیا ته په نغوتې سره وايي، چې په وروستیو کلونو کې د مخابراتي سکټور په برخه کې د پانګونې کچه لوړه شوې او په دې برخه کې د دوه اعشاریه اته میلیارډ ډالرو په ارزښت پانګونه شوې ده.
د دغې ادارې تخنيکي مرستيال په هېواد کې د مخابراتي خدمتونو پر پراختيا په ټینګار سره، هېوادوالو ته د مخابراتي خدمتونو د وړاندې کولو په برخه کې د لا زياتو اسانتياوو د برابرولو لپاره د هڅو خبره کوي.
د اترا ادارې تخنیکي مرستیال، عطا محمد یاري وايي:« تر ۲.۸ میلیارد ډالرو زیاتې پانګونې په مخابراتي برخه کې شوي دي، او یوازې په وروستي کال کې ۱۸۷ میلیون ډالر پانګونه شوې ده. موږ په تدریجي ډول په دې برخه کې د پانګونو د پراختیا شاهدان یو.»
ښاغلی یاري په خپلو خبرو کې وایي، تر اوسه په ټول هېواد کې خلکو ته ۳۳،۹ میلیونه سیم کارتونه وېشل شوي دي.
د اترا تخنیکي مرستیال زیاتوي، چې اوسمهال د افغانستان۹ زره ۱۳۸ کیلومتره خاوره له نوري فایبر سره نښلول شوې ده.
هغه زیاته کړه: « نوري فایبر یو بنسټیز جوړښت دی، چې په ډېرو هېوادونو کې د ځمکنیو اړیکو او اقتصادي پراختیا لپاره ډېر اغېزناک دی. دا مهال د افغانستان په اوږدو کې ۹۱۳۸ کیلومتره خاوره له نوري فایبر سره نښلول شوې او دا خدمتونه په لویو ښارونو کې هم لاسرسي وړ دي.»
بلخوا، د روشن مخابراتي شرکت هېوادوالو ته د غوره خدمتونو پر وړاندې کولو په ټینګار سره خپلو پېرېدونکو ته د الفا پریم په نوم نوې انټرنېټې کڅوړه وړاندې کړه.
د دغه شرکت د مخابراتو او بازارموندنې څانګې مرستیال د دې نوې کڅوړې د ځانګړتیاوو په تړاو داسې وایي. د روشن شرکت د اړیکو او بازارموندنې مرستیال، عبدالعزیز نیازي و ویل: « په دې کڅوړه کې روشن شبکې ته نامحدود دقیقې، نورو شبکو ته دقیقې، او تر ټولو مهمه د وټس اپ نامحدوده استعمال شامل دی؛ دا ځانګړتیا تر اوسه هېڅ بل شرکت نه ده وړاندې کړې.»
د اترا ادارې مسوولان دغه راز د هېواد له ټولو مخابراتي شرکتونو غوښتي چې د سالمې سیالۍ په کولو سره هېوادوالو ته د مخابراتي سکټور په برخه کې لا ښه او لوړ کیفیته خدمتونه وړاندې کړي.
