د طالبانو استخبارات: د کډوالو وزارت دوه کارکوونکي د حقاني په وژنه کې د لاس لرلو په تور ونیول
دید خبرې آژانس: باوري سرچينو ويلي، چې د طا-لبانو استخباراتو د کډوالو چارو وزارت دوه کارکوونکي د دغې ډلې د کډوالو چارو د وزير خليل الرحمن حقاني په وژنه کې د لاس لرلو په تور نيولي دي. تر اوسه د دغو کارمنانو د هويت په اړه څه نه دي ويل شوي.
باوري سرچينو د شنبې په ورځ ويلې چې بريدګر د کډوالو چارو وزارت په انګړ کې څو ساعته انتظار و، چې خليل حقاني ته ورشي او خپلو باروتو ته چاودنه ورکړي.
د دغو سرچینو په وینا، خلیل حقاني ډیری وخت د وزارت له مراجعینو سره له نږدې لیده کاته کول او کله چې بریدګر خلیل حقاني ته نږدې شو، په ځان پسي تړلو چاودیدونکو توکو ته یې چاودنه ورکړه.
دا لا څرګنده نه ده چې دغو نیول شویو کسانو په دې وزارت کې کوم مسوولیت درلود او ایا د پخواني افغان حکومت کارکوونکي وو او که د طالبانو له خوا ګمارل شوي کسان دي.
په دغه برید کې د خلیل الرحمن حقاني تر څنګ لږ تر لږه شپږو نورو کسانو هم خپل ژوند له لاسه ورکړی دی.
طا-لبانو تر اوسه د دې پېښې په تړاو د خپلو کسانو د نيول کېدو په اړه څه نه دي ويلي.
دا لا څرګنده نه ده چې دې ډلې د یادو دووکسانو ترڅنګ نور کسان هم نیولي دي او که نه.
د طا-لبانو د کډوالو چارو وزیر خلیل حقاني د چهارشنبې په ورځ د لیندۍ په ۲۱ په یوه ځانمرګي برید کې ووژل شو، د یاد برید پړه داعش پر غاړه اخیستې ده.
د طا-لبانو له خوا د خپرو شویو معلوماتو له مخې، بریدګر چاودېدونکي توکي په پلستر پوښلي لاس کې ځای پر ځای کړي وو.
