د دید خبري اژانس: د کابل-جلال آباد لویه لاره د غارو تنګي په سیمه کې د سختو بارانونو، سیلابونو او ځمکې ښویېدو له امله یو ځل بیا په بشپړه توګه د ترافیکو پرمخ وتړل شوه.
د ټولګټو وزارت په وینا، دا سړک، چې د جمعې په سهار، د حمل په ۱۴مه، د کابل ولایت د ټولګټو وزارت د تخنیکي او عملیاتي ټیمونو د هڅو په پایله کې پرانیستل شو، د ماښام شاوخوا ۷:۰۰ بجې بیا وتړل شو. د درنو بارانونو دوام، سیلابونه او د سړک په سطحه د ډبرو ښویېدل د دې بندیدو اصلي عوامل دي.
راپورونه دا هم ښیي چې د دې لویې لارې دوهم سړک هم د سیلابونو له امله ویجاړ شوی او په پایله کې، اصلي او بدیل سړکونه دواړه د ټولو موټرو پرمخ تړل شوي دي.
د ټولګټو وزارت له خلکو او موټر چلوونکو څخه غوښتي چې تر بلې خبرتیا پورې په دې سړک له سفر کولو ډډه وکړي. وزارت دا خبرداری هم ورکړی چې په دې سیمه کې د ډبرو د ښویېدو د دوام احتمال شته.