د دید خبري اژانس: د هرات سیمه ییزو چارواکو اعلان وکړ چې د دې ولایت د سوداګرو یوې ډلې د ایران د خلکو د ملاتړ لپاره ۱۵ میلیونه افغانۍ د بشري مرستې په توګه راټولې کړې او په هرات کې یې د ایران سیاسي نمایندګي ته سپارلې دي.
د بحران په ورځو کې د پولې هاخوا خواخوږي؛ د هرات د سوداګرو لخوا ایران ته ۱۵ میلیونه افغانۍ مرسته
د هرات د سوداګرۍ او پانګونې خونې مشر محمد یونس قاضي زاده وویل چې دا مرسته د سوداګرو او خصوصي سکتور لخوا راټوله شوې او د شنبې په ورځ د ایران قونسلګرۍ ته وسپارل شوه. هغه د دې اقدام هدف “په اوسنیو سختو شرایطو کې د ایران له خلکو سره د خواخوږۍ څرګندول” وباله او زیاته یې کړه چې د نورو مرستو د راټولولو هڅې روانې دي.
په ورته وخت کې، په هرات کې د ایران قونسل علیرضا مرحمتي، د دې اقدام ستاینه وکړه او اعلان یې وکړ چې په هرات کې د خلکو مختلفو برخو په ایران کې د ښوونځیو او طبي مرکزونو په بیارغونه کې د همکارۍ لپاره خپل چمتووالی څرګند کړی دی. هغه همدارنګه ټینګار وکړ چې د دواړو هېوادونو ترمنځ سوداګري په عادي ډول روانه ده.
له بلې خوا، د ایران د بهرنیو چارو وزیر عباس عراقچي د افغانستان له حکومت څخه د هغو ایراني اتباعو د بیرته راستنولو په برخه کې د همکارۍ له امله مننه وکړه چې په نورو هېوادونو کې بند پاتې وو. د هغه په وینا، شاوخوا یوه اونۍ مخکي، د ایرانيانو یوه ډله چې په متحده عربي اماراتو کې بند پاتې وو، لومړی هرات ته ولیږدول شوه او بیا د ځمکې له لارې ایران ته ننوتل.