د دید خبري اژانس: د طالبانو د حکومت د لومړي وزیر اداري مرستیال مولوي عبدالسلام حنفي، د ولسمشرۍ په ماڼۍ کې د اختر د لمانځه په خطبه کې د سیمه ییزو او بهرنیو هیوادونو سره د ښو اړیکو او متقابل درناوي د رامینځته کولو پر اړتیا ټینګار وکړ. هغه وویل چې د طالبانو حکومت د نورو هیوادونو په کورنیو چارو کې لاسوهنه نه کوي او غوره ګڼي چې د ډیپلوماسۍ له لارې ستونزې حل کړي.
په ورته وخت کې، حنفي خبرداری ورکړ چې د افغانستان په خاوره کې د هر ډول تیري په صورت کې، د طالبانو حکومت دفاع او غچ اخیستل خپل “شرعي او اساسي حق” ګڼي.
د ملي یووالي او پیوستون اهمیت ته په اشارې سره، هغه له ښاریانو وغوښتل چې د اختر په جریان کې کونډې، یتیمان، کډوال او اړمنې کورنۍ هیرې نه کړي.
د اختر لمونځ د طالبانو د حکومت د لوړ پوړو چارواکو په شتون کې د ولسمشرۍ په ماڼۍ کې ترسره شو.