د دید خبري اژانس: د طالبانو د حکومت ویاند ذبیح الله مجاهد د روسیې د بهرنیو چارو وزارت هغه ادعا رد کړه چې وايي د نړیوالو ترهګرو سازمانونو زرګونه جنګیالي د افغانستان په خاوره کې شتون لري، او دا راپورونه یې “غلط” او پر ناسمو معلوماتو ولاړ وبلل.
مجاهد ټینګار وکړ چې افغانستان “خوندي” دی او هیڅ بهرنۍ وسله واله ډله هلته فعاله نه ده. د هغه په وینا، د افغانستان جغرافیه د یو واحد حکومت لاندې ده، چې د بهرني ډلې د فعالیت کولو مخه نیسي. هغه د روسي سرچینو لخوا د داسې ادعاوو په اړه خواشیني څرګنده کړه، او زیاته یې کړه چې دا ډول راپورونه “د امریکا د اشغال پرمهال” هم تکرار شوي.
د طالبانو ویاند له مسکو څخه وغوښتل چې په افغانستان کې د “عیني واقعیتونو” پراساس خپلې ارزونې تازه کړي.
د روسیې د بهرنیو چارو وزارت مخکې په خپله رسمي ویب پاڼه کې اعلان کړی و چې په افغانستان کې د نړیوالو ترهګرو سازمانونو د جنګیالیو شمیر د ۲۰،۰۰۰ او ۲۳،۰۰۰ ترمنځ اټکل شوی، او له نیمایي څخه ډیر یې بهرني اتباع دي.