د دید خبري اژانس: د ترکیې پولیسو د غیرقانوني کډوالو په وړاندې د خپلو روانو عملیاتو په ترڅ کې، د هیواد په دوو ولایتونو کې لسګونه افغان کډوال ونیول او د بهرنیو اتباعو د بیرته راستنیدو مرکزونو ته یې انتقال کړل.
د ترکیې د مهاجرت پالیسیو د شدت په دوام، د هیواد پولیسو ځواکونو په بیلابیلو ولایتونو کې یو شمیر نور افغان کډوال ونیول او د بهرنیو اتباعو د توقیف مرکزونو ته یې انتقال کړل.
د ترکیې رسنیو راپور ورکړ چې د ساکاریا ولایت پولیسو د عملیاتو په جریان کې ۱۹ افغان کډوال چې د قانوني استوګنې اسناد نلري وپیژندل او د اداري ګامونه له تیریدو وروسته یې له هیواد څخه وشړل.
همدارنګه، د بنګول په ولایت کې، ۱۲ نور افغان کډوال د انساني قاچاق سره د مبارزې په اړوند عملیاتو کې ونیول شول او د بهرنیو اتباعو د بیرته راستنیدو مرکزونو ته لیږدول شوي ترڅو د دوی د استوګنې حالت ته بیاکتنه وکړي.
د ځینو افغان او نړیوالو رسنیو د راپورونو له مخې، ترکیې د تیر کال له پیل راهیسې په ټول هیواد کې د پراخو امنیتي عملیاتو په بڼه د غیرقانوني کډوالو په وړاندې خپل اقدامات زیات کړي دي.
دا په داسې حال کې ده چې ځینې سرچینې په دې موده کې د ۳۰،۰۰۰ څخه زیاتو افغان کډوالو د نیولو خبر ورکوي، خو دا شمېره لا تر اوسه د ترکیې د کډوالۍ ادارې او د کورنیو چارو وزارت لخوا په رسمي ډول نه ده تایید شوې.