د دید خبري اژانس: د پاکستان د بهرنیو چارو وزیر اسحاق ډار او د هغه چینایي سیال وانګ يي د پاکستان او چین ملګرتیا د سیمه ییزې سولې او ثبات لپاره “حیاتي” وبلله. دا څرګندونې په داسې حال کې وشوې چې دواړو خواوو په بیجینګ کې د پاکستان او چین د بهرنیو چارو وزیرانو د ستراتیژیکو خبرو اترو د اووم پړاو په ګډه مشري وکړه.
ډار او وانګ يي: د پاکستان او چین ملګرتیا د سیمه ییزې سولې او ثبات لپاره “حیاتي” ده
اسحاق ډار د شنبې په ورځ د وانګ يي په بلنه بیجینګ ته ورسید، چې اصلي موخه یې د ستراتیژیکو خبرو اترو ګډه مشري کول وو.
د خبرو اترو له پای ته رسیدو وروسته، د پاکستان د بهرنیو چارو وزارت په یوه بیان کې وویل: “د جامع همکارۍ د ستراتیژیکو ملګرتیا اهمیت په ګوته کولو سره، دواړو مشرانو بیا تایید کړه چې د پاکستان او چین ملګرتیا په سیمه او دواړو هیوادونو کې د سولې، ثبات او سوکالۍ لپاره خورا مهمه ده.”
په بیان کې دا هم ویل شوي چې دواړو خواوو موافقه وکړه چې په دوه اړخیزه او څو اړخیزه کچه همغږي پیاوړې کړي.
د پاکستان د بهرنیو چارو وزارت په وینا، دواړو خواوو د پاکستان او چین د اړیکو ټول اړخونه وڅیړل او “په سیمه ایزه او نړیواله کچه د مهمو مسلو” په اړه یې نظرونه تبادله کړل. د چین او پاکستان اقتصادي دهلیز (CPEC)، سوداګرۍ، څو اړخیزه همکارۍ او د خلکو ترمنځ تبادلې هم بحث شوې.