د دید خبري اژانس: د سارک منشور د ۴۰مې کلیزې په مناسبت، د پاکستان ولسمشر اصف علي زرداري او صدراعظم شهباز شریف اعلان وکړ چې اسلام آباد د سویلي آسیا له ټولو لیواله هیوادونو سره د سوداګرۍ، ټرانزیټ او انرژۍ اړیکو د پراخولو لپاره همکارۍ ته چمتو دی او د سارک منشور اصولو او اهدافو ته ژمن دی.
د پاکستاني رسنیو په وینا، زرداري د سویلي آسیا، مرکزي آسیا او منځني ختیځ لپاره د نښلونکي نقطې په توګه د پاکستان جیوپولټیک موقعیت باندې ټینګار وکړ او ویې ویل چې اسلام آباد د خلکو ترمنځ د اړیکو د پیاوړتیا او په ټوله سیمه کې د ګډو ګټو د رامینځته کولو لپاره پراخې همکارۍ ته چمتو دی.
هغه زیاته کړه چې سیمه ایزې ننګونې یوازې د یوې ګډې طریقې سره حل کیدی شي او د سویلي آسیا هیوادونه باید د “وضاحت او صداقت” سره راتلونکي ته حرکت وکړي.
د پاکستان ولسمشر وویل چې متقابل درناوی او عملي همکاري کولی شي د راتلونکو نسلونو لپاره د “ډیرې سوله ایزې” سویلي آسیا لپاره لاره هواره کړي.
په یوه جلا پیغام کې، لومړي وزیر شهباز شریف هم د “همکارۍ، ټول شموله او مخ په وړاندې تلونکي” سیمه ایز نظم لپاره د پاکستان پر ژمنې ټینګار وکړ او د سویلي آسیا د پراخو ظرفیتونو په کارولو کې یې د سارک رول مهم وګاڼه.
د تاوتریخوالي د دوام او د افغانستان او پاکستان ترمنځ د سرحدونو د بندیدو سره، دواړه هیوادونه د سوداګرۍ لپاره بدیلې لارې لټوي.