د دید خبري اژانس: د اسلامي پیوستون فوټسال ټورنمنټ لپاره قرعه کشي په ریاض کې ترسره شوه او د افغانستان د ۱۷ کلنو فوټسال ملي لوبډلې خپل سیالان وپیژندل.
د قرعه کشۍ د پایلو پراساس، چې د پنجشنبې په ورځ (د عقرب لومړۍ) په ریاض کې ترسره شوه، د افغانستان د ځوانانو لوبډله د ایران، مراکش او تاجکستان سره په B ګروپ کې شامله شوه. د سعودي عربستان، ازبکستان، اذربایجان او لیبیا لوبډلې په A ګروپ کې دي.
دا سیالۍ به سږکال د نومبر له ۴ څخه تر ۱۱ پورې په سعودي عربستان کې ترسره شي. د ټورنمنټ هدف د سپورت له لارې د اسلامي هیوادونو ترمنځ همکاري او دوستي پیاوړې کول دي.