د یوناما مرستیال په بامیان کې د پراختیایي پروژو څخه لیدنه وکړه
د دید خبري اژانس: په افغانستان کې د ملګرو ملتونو د دفتر مرستیالې او د بشري مرستو همغږي کوونکې، ایندریکا راتواټه، د بامیان ولایت ته د خپل سفر په جریان کې د پوهنې، روغتیا، کرنې او معیشت په برخو کې د سازمان د پراختیایي پروژو څخه لیدنه وکړه.
د یوناما مرستیال په بامیان کې د پراختیایي پروژو څخه لیدنه وکړه
د یوناما مرستیال د سفر وروسته خبریالانو ته وویل چې د افغانستان مختلفو ولایتونو ته د هغې د سفر هدف د خلکو اړتیاوې ارزول او د ملاتړ کونکو هیوادونو سره یې شریکول دي. هغې زیاته کړه چې هغې تر دې دمه د هیواد لږترلږه ۲۴ ولایتونو څخه لیدنه کړې ده.
د یوناما د مرستیال په وینا، د نړیوالو مرستو کمښت د افغانانو په ژوند، په ځانګړې توګه د پوهنې او روغتیا په سکتورونو کې، چې د سرچینو او اسانتیاوو له نشتوالي سره مخ دي، د پام وړ اغیزه کړې ده.
راتواټه دا هم یادونه وکړه چې افغانستان سږکال له دریو لویو بحرانونو سره مخ دی – وچکالي، زلزله او د کډوالو مسله. هغه زیاته کړه چې دې بحرانونو د خلکو په ژوند او هوساینې مستقیم اغیزه کړې ده.
هغه ټینګار وکړ چې ملګري ملتونه د نړیوالو ادارو او مرستندویه هیوادونو سره په نږدې همغږۍ کې د دې ننګونو د حل لپاره د اغیزمنو او دوامداره حل لارو موندلو لپاره کار کوي.