روسیه خبرداری ورکوي: په افغانستان کې د داعش واک ته رسیدل مرکزي آسیا ته مخ په زیاتیدونکی ګواښ دی
د دید خبري اژانس: د روسیې د فدرالي امنیتي خدماتو مشر اعلان وکړ چې د داعش خراسان څانګه په افغانستان کې پراخیږي او د بهرنیو شبکو په ملاتړ سره د منځنۍ آسیا هیوادونو لپاره جدي ګواښ دی او سیمه بې ثباته کوي.
د روسیې د فدرالي امنیتي خدماتو مشر الکساندر بورتنیکوف په سمرقند کې د CIS غړو هیوادونو د امنیتي ادارو د مشرانو شورا په غونډه کې اعلان وکړ چې افغانستان ته د داعش جنګیالیو لیږد زیات شوی او د دې ډلې خراسان څانګه اوس د مرکزي آسیا هیوادونو لپاره مخ په زیاتیدونکی ګواښ ګرځیدلی دی.
هغه ټینګار وکړ چې ځینې بهرني خصوصي نظامي شرکتونه د خراسان څانګې په پیاوړتیا کې رول لوبوي او د داعش اصلي هدف د CIS غړو هیوادونو سویلي پولو ته ننوتل او سیمه بې ثباته کول دي.
بورتنیکوف زیاته کړه چې د داعش خراسان څانګه په تاجک، قرغز، ازبک او قزاق ژبو کې پراخه آنلاین تبلیغات ترسره کوي او په مستقیم ډول د ځایی ټولنو څخه استخدام تعقیبوي.
هغه په افغانستان کې د وسله والو د روزنیزو کمپونو د پراختیا په اړه هم راپور ورکړ، چې د بهرنیو استخباراتي خدماتو په ملاتړ جوړیږي.
د روسیې د فدرالي امنیتي خدماتو مشر د “نړیوال خلافت” د داعش شعار ته په اشارې سره وویل چې دا ډله هڅه کوي چې د منځنۍ آسیا هیوادونو ته نفوذ وکړي او د داعش په لیکو کې د دې هیوادونو د اتباعو د شتون زیاتوالی د اندیښنې وړ دی.
هغه دا هم وویل چې د ګډو امنیتي عملیاتو پایلې ښیې چې د منځنۍ آسیا جمهوریتونو او روسیې په وړاندې د داعش فعالیتونه مخ په زیاتیدو دي او د افغانستان د امنیتي وضعیت د کنټرول لپاره له طالبانو سره استخباراتي همکاري اړینه ده.
مخکې له دې، د روسیې د امنیت شورا منشي سرګي شایګو اعلان وکړ چې د نړیوالو ترهګرو ډلو سره تړلي له ۲۳۰۰۰ څخه ډیر جنګیالي په افغانستان کې د طالبانو تر کنټرول لاندې شتون لري.