د دید خبري اژانس: د طالبانو حکومت او د پاکستان د بهرنیو چارو وزارت د دواړو خواوو ترمنځ د ۴۸ ساعته اوربند د ټینګولو لپاره د یوې موافقې اعلان وکړ.
اوربند نن، چهارشنبه، د میزان ٢۳مه، د ماښام په ۵:۳۰ بجو پیل شو.
د طالبانو د حکومت ویاند ذبیح الله مجاهد په یوه اعلامیه کې وویل چې اوربند “د پاکستان په ټینګار سره” نافذ شو. طالبانو له خپلو جنګیالیو وغوښتل چې د دې تړون درناوی وکړي.
په ورته وخت کې، د پاکستان د بهرنیو چارو وزارت اعلان وکړ چې اوربند د طالبانو د حکومت په غوښتنه رامنځته شو، او ټینګار یې وکړ چې دواړه خواوې غواړي چې وروستي کړکېچونه د خبرو اترو له لارې حل کړي.
دا موافقه وروسته له هغه وشوه چې د پاکستان پوځ ادعا وکړه چې په کابل او کندهار کې یې په هوايي بریدونو کې “د تحریک طالبان پاکستان (TTP) د مشرتابه مرکز” په نښه کړی دی. طالبانو تر اوسه د پاکستان د پوځ دا ادعا نه تایید کړې او نه یې رد کړې ده.
په کابل کې ځايي سرچینې وايي چې د دې بریدونو له امله د رامنځته شویو چاودنو شدت ډېر قوي و او د پیښې ځای ته څېرمه د ډېرو کورونو کړکۍ ماتې شوې.
د دې بریدونو له امله د تلفاتو وروستۍ شمېره لا نه ده معلومه شوې.