د دید خبري اژانس: په افغانستان کې د انټرنېټ د پراخ بندښت وروسته، د سیمې هېوادونو ته د هوايي ټکټونو بیه بې ساري کچې ته لوړه شوې ده.
د انټرنېټ بندښت؛ په هېواد کې د هوايي ټکټونو په بیو کې د پام وړ زیاتوالی
په افغانستان کې د انټرنېټ د دوه ورځني بندښت وروسته، د هوايي ټکټونو بیه بې ساري کچې ته لوړه شوې ده. د سفر شرکتونه او مسافرین وايي چې د کابل-دوبۍ په ګډون په ځینو لارو کې د ټکټونو بیې ناڅاپه تر درې چنده پورې لوړې شوې دي.
د سفر شرکت یو کارمند عبدالراشد له رسنیو سره په مرکه کې وویل: “د انټرنېټ بندښت څخه مخکې، د ټکټونو بیه معمولا د ۲۷۰ او ۲۷۵ ډالرو ترمنځ وه، خو اوس ۷۰۰ ډالرو او حتی لوړه شوې ده.
د دې اصلي لامل د ریزرویشن سیسټمونو کې ګډوډي او د انټرنېټ له بیا نښلولو وروسته د تقاضا ناڅاپي زیاتوالی دی.”
د ګرځندوی شرکتونو یو بل کارمند، سجاد زیاته کړه: “د انټرنیټ بندیدو پرمهال، ډیری الوتنې لغوه شوې. وروسته له هغه چې انټرنیټ بیا وصل شو، د ټکټونو په همغږۍ او راجستر کولو کې ډیری ستونزې وې. اوس، تقاضا زیاته شوې، چې د نرخونو د لوړیدو لامل شوې ده.
د راپورونو له مخې، د کابل-دوبۍ د ټکټ بیه اوس مهال د $700 او $1,000 ترمنځ توپیر لري؛ یوه شمیره چې د مسافرینو په وینا، د اصلي قیمت څخه څو چنده ده او د ډیری کورنیو لپاره یې د سفر لګښت ناممکن کړی دی.
د کام ایر د پلور مدیر، بشیر احمد طلیق په وینا، د انټرنیټ بندیدو د کورني او نړیوال ریزرویشن سیسټمونو د درولو لامل شوی، او دا د ټکټونو په نرخ او عرضه مستقیم اغیزه کړې ده.