په دوحه کې د اسراییلو هوايي برید؛ د حماس مشرانو غونډه په نښه شوه
د دید خبري اژانس: د قطر په پلازمېنه کې د څو چاودنو وروسته، مختلفو سرچینو په دوحه کې د حماس مشرانو د غونډې په ځای کې د اسراییلو هوايي برید راپور ورکړ؛ یو برید چې د اسراییلي رسنیو په وینا، د متحده ایالاتو په پوهه او همغږۍ سره ترسره شوی او د نړیوالو غبرګونونو څپه یې راپارولې ده.
په دوحه کې د اسراییلو هوايي برید؛ د حماس مشرانو غونډه په نښه شوه
نن ماسپښین (سه شنبه، د سنبلې ١۸مه)، د قطر د پلازمینې دوحې په کتارا سیمه کې څو چاودنې وشوې. څو ساعته وروسته، د اسراییلو پوځ د برید مسؤلیت په غاړه واخیست او اعلان یې وکړ چې دوی د شاباک په همکارۍ د هوايي ځواک له لارې د حماس مشرانو پورې اړوند ودانۍ په نښه کړې ده.
اسرایلي رسنیو ادعا کړې چې په غونډه کې حاضر قوماندانان، په شمول د خالد مشعل، موسی ابو مرزوق او خلیل الحیه، د اکتوبر د ۷مې په عملیاتو کې “مستقیم رول” درلود.
ځینو غیر رسمي سرچینو د حماس د څلورو لوړ پوړو غړو د شهادت خبر ورکړی دی، خو غورځنګ ته نږدې سرچینو ټینګار کړی چې د حماس مذاکراتي ټیم له برید څخه ژوندی پاتې شوی دی.
الجزیرې راپور ورکړی چې دا غونډه د ډونالډ ټرمپ د وروستي اوربند وړاندیز په اړه د بحث لپاره جوړه شوې وه.
په ورته وخت کې، عبراني رسنیو څرګنده کړه چې متحده ایالات د عملیاتو څخه دمخه خبر وو او شنه څراغ یې ورکړی و.
د قطر د بهرنیو چارو وزارت یوه اعلامیه خپره کړه چې په کې یې د دوی په خاوره کې د اسراییلو برید “بزدلانه، جرمي او د نړیوالو قوانینو څخه سرغړونه” وبلله او خبرداری یې ورکړ چې د قطر امنیت او حاکمیت ته هیڅ ګواښ به بې ځوابه پاتې نشي.
ځینو قطري سرچینو هم ټینګار کړی چې د لوړې کچې پلټنې روانې دي او د تلفاتو او د برید د نوعیت په اړه نور جزئیات به ډیر ژر اعلان شي.