د دید خبري اژانس: د مالیزیا حکومت اعلان وکړ چې دوی به “د مالیزیا د ناورینونو د مرستې او ژغورنې ځانګړې ډله” (SMART) افغانستان ته واستوي ترڅو په افغانستان کې د وروستۍ زلزلې قربانیانو سره مرسته وکړي.
مالیزیا به افغانستان ته ځانګړې مرستندویه ډله واستوي
د مالیزیا د لومړي وزیر مرستیال ډاکټر احمد زاهد حمیدي وویل چې د دې ماموریت د پیاوړتیا لپاره به د هیواد د دفاع وزیر داتوک سري محمد خالد نوردین سره اړین همغږي وشي، ترڅو د مالیزیا د وسله والو ځواکونو روغتیایی پرسونل هم پدې عملیاتو کې شتون ولري.
د احمد زاهد په وینا، د مالیزیا حکومت به په دې بشري ماموریت کې د ناورینونو په ځواب کې تجربه لرونکي غیر دولتي سازمانونه هم وکاروي.
ټاکل شوې ده چې سبا، دوشنبه، په کوالالمپور کې د افغانستان له سفیر سره اړیکې ونیول شي ترڅو د ټیم د لیږلو وروستي توضیحات او د مرستې عملیاتو د پلي کولو څرنګوالی وټاکي.