د دید خبري اژانس: کابل به ډېر ژر د برېښنا په سکتور کې د پانګونې یو لوی کنفرانس کوربه وي، دا غونډه د کورنیو او سیمه ییزو پانګوالو په ګډون ترسره کېږي چې موخه یې په افغانستان کې د انرژۍ پراختیا لپاره فرصتونه، ننګونې او حل لارې څېړل دي.
د افغانستان د برېښنا ادارې (برېشنا) اعلان کړی چې کابل به ډېر ژر د برېښنا په سکتور کې د پانګونې یو لوی کنفرانس کوربه وي.
دا کنفرانس به د دولتي ادارو، کورنیو او سیمه ییزو پانګوالو په ګډون ترسره شي او په هېواد کې د برېښنا صنعت د پراختیا لپاره به د فرصتونو، ننګونو او حل لارو په څېړلو تمرکز وکړي.
دا کنفرانس په داسې وخت کې پلان شوی چې ایران په دې وروستیو کې افغانستان ته د برېښنا صادراتو کې ۷۰ سلنه کمښت اعلان کړی دی؛ یوه داسې موضوع چې د ایران د انرژۍ چارواکو د کورنیو اړتیاوو د پوره کولو له لومړیتوب سره تړلې ده.
د برېښنا د وارداتو د کمښت سره سم، سرپرست حکومت د کورني برېښنا تولید ظرفیت پراخولو هڅې پیل کړې دي. په دې اقداماتو کې د ترکیې او سیمه ییزو شرکتونو سره د بغلان ولایت د ډبرو سکرو څخه د ۱۶۰ میګاواټه برېښنا تولید لپاره د تفاهم یادداشت لاسلیک کول شامل دي.
همدارنګه، په دې وروستیو کې د ازبکستان څخه افغانستان ته د ۵۰۰ کیلو واټه لاین له لارې د ۱۰۰۰ میګاواټه برېښنا د لېږد قرارداد د دې هېواد د چارواکو او د ازبکستان حکومت ترمنځ لاسلیک شو. په دې پروژه کې به د برېښنا د لېږد لاین او درې سب سټیشنونه جوړول شامل وي.
سربیره پردې، د نوي کیدونکي انرژۍ په برخه کې هم لویې پانګونې روانې دي.
د راپورونو له مخې، د عزیزي ګروپ لخوا د ۱۰ ملیارد ډالرو پروژه په هرات ولایت کې پیل شوې، چې ټاکل شوې ده د سیمې د باد، لمر او اوبو برېښنا ظرفیتونه د برېښنا تولید لپاره وکاروي.
په دې اړه، د برېښنا ریاست مشر عبدالباري عمر په دې وروستیو کې د هرات ولایت د برېښنا زیربنا د پیاوړتیا لپاره له خصوصي شرکتونو سره د ۴۱ ملیون ډالرو په ارزښت یو قرارداد لاسلیک کړ.