مایکل مک کال: له افغانستان څخه وتل د امریکا په تاریخ کې یوه داغ ده
د دید خبري اژانس: څلور کاله مخکي، د ۲۰۲۱ کال د اګست د ۳۰مې ( د سنبلې ٩) په سهار، د امریکايي سرتیرو وروستۍ ډله د کابل له هوايي ډګر څخه ووتله، چې په افغانستان کې یې د امریکا دوه لسیزې پوځي شتون پای ته ورساوه. دا وتل دوه اونۍ وروسته له هغه وشول چې طالبانو کابل ونیو او د وتلو د عملیاتو په جریان کې یوه مرګوني ځانمرګي برید لسګونه افغانان او ۱۳ امریکایي سرتیري ووژل.
د امریکا د کانګرس غړي مایکل مک کال د وتلو بهیر “ناورین” او “د امریکا د خلکو په تاریخ کې یو خونړی داغ” وباله، او د بایډن اداره یې د امنیتي چمتووالي په غفلت او د افغان متحدینو په پریښودو تورنه کړه.
هغه په ټولنیز شبکه ایکس کې ولیکل چې د بایډن ادارې د ژمنې سره سره چې “هیڅوک به شاته پاتې نشي”، لږترلږه ۱۰۰۰ امریکایان او زرګونه افغان متحدین بې ملاتړه پاتې شول.
مککال زیاته کړه چې د سپینې ماڼۍ بې پروايي د امریکا متحدین د طالبانو د غچ اخیستنې قرباني کړي دي، ترهګري په سیمه کې بیا راڅرګنده شوې ده، او د امریکا کمزوري په نړیواله کچه څرګنده شوې ده، چې ولادیمیر پوتین او د هیواد نور دښمنان یې هڅولي دي.
هغه ټینګار وکړ: “دې ناورین وتلو زموږ د ملت په تاریخ کې یو خونړی داغ پریښود، مګر دا له پامه غورځول کیدی نشي.”
دا د بایډن ادارې د تکرار ټینګار سره سره راځي چې د طالبانو سره د سولې تړون پلي کول د پخوانۍ ادارې (ټرمپ) میراث و او د هغې دوام حتمي و.