جرمني د افغان کډوالو د شړلو لړۍ پراخه کړه
د دید خبري اژانس: د جرمني لومړي وزیر فریدریش میرټز اعلان وکړ چې هیواد یې غواړي نور افغان کډوال افغانستان ته راستانه کړي. د سرطان په وروستیو کې د ۸۱ افغان کډوالو د شړلو په اړه، هغه وویل چې د اوسني حکومت پالیسي دا ده چې ځان د پخواني جرمني حکومت د “پرانیستو دروازو” له چلند څخه لرې کړي.
میرټز د شنبې په ورځ (د سنبلې ۸مه) ټینګار وکړ چې د هغه حکومت “د مهاجرت په پالیسۍ کې بدلون” ته ژمن دی او د کډوالو د راتګ کموالی یې په یوه لسیزه کې تر ټولو ټیټې کچې ته رسول د برلین لپاره یوه مهمه بریا ګڼلې.
د هغه په وینا، د می په میاشت کې د نوي حکومت له واک ته رسیدو راهیسې، د پولې کنټرولونه سخت شوي او تر اوسه پورې له ۱۰۰۰۰ څخه ډیر بې اسناده کډوال له جرمني څخه ایستل شوي دي. هغه د کډوالو د کورنیو د بیا یوځای کیدو په اړه نوي محدودیتونه هم اعلان کړل او ویې ویل چې په دې برخه کې به له اروپايي هیوادونو سره نږدې همکاري دوام ولري.
د سرطان په لومړیو کې، جرمني ۸۱ افغان اتباع چې د جرمونو په ترسره کولو تورن وو، وشړل. دې اقدام په اروپا کې د نورو کډوالو بیرته افغانستان ته د لیږلو په اړه د بحث څپه راپورته کړه.
د طالبانو حکومت له دې اقدام څخه د لویدیځو حکومتونو سره د خپلو اړیکو د زیاتولو لپاره کار اخیستی دی، د ډلې دوه ډیپلوماتان په برلین کې د افغانستان سفارت او په بن کې قونسلګرۍ ته ښه راغلاست ویل شوي دي.
په ورته وخت کې، په افغانستان کې د بشري حقونو په اړه د ملګرو ملتونو ځانګړي راپور ورکوونکي، ریچارډ بینټ، د افغان کډوالو د دوامداره اخراج په وړاندې خبرداری ورکړی او د دې پروسې د سمدستي بندولو غوښتنه یې کړې ده.