افغان کارپوه: د پاکستان هوايي بریدونه به معکوس ځواب ورکړي
د دید خبري اژانس: د تحریک طالبان پاکستان (ټي ټي پي) ډلې سره د مقابلې په پلمه د پاکستان له خوا د افغانستان په خاوره د پرله پسې بریدونو وروسته، یو افغان خبریال خبرداری ورکړ چې دا اقدامات به نه یوازې د ګواښ کمولو کې مرسته ونکړي، بلکې د نارضایتۍ او افغانانو د دې افراطي ډلې سره د یوځای کیدو لامل به هم شي.
په دوحه کې میشت یو افغان خبریال سمیع یوسفزي د افغانستان په سرحدي سیمو کې د پاکستان په وروستیو بریدونو نیوکه وکړه او ټینګار یې وکړ چې دا ډول پوځي اقدامات به د ټي ټي پي ډلې د ځواک کمولو کې مرسته ونکړي.
هغه وویل: “که پاکستان د ټي ټي پي په پلمه په ورځ کې لس ځله افغانستان بمبار کړي، نو پایله به یې یوازې د افغانانو غم او غوسه وي او د ډلې د ځواک کمښت نه وي. دا بریدونه ممکن حتی ځینې افغانان وهڅوي چې د غچ اخیستلو لپاره له ټي ټي پي سره یوځای شي.”
یوسفزي یادونه وکړه چې د افراطیت سره د مقابلې او د امنیتي کړکیچونو د حل په بمبارۍ کې نه، بلکې په خبرو اترو او د دواړو هیوادونو د توپیرونو د اصلي لاملونو په حل کې دی.
هغه زیاته کړه: “پاکستان باید پر ټي ټي پي باندې د برید کولو څخه مخکې د دوه اړخیزې سوداګرۍ، د خلکو د تګ راتګ، د مهاجرینو د وضعیت او سرحدونو په څیر اساسي مسلو ته پام وکړي.
که دا مسلې حل شي، نو د ټي ټي پي په څیر د افراطي ډلو د مدیریت لپاره به زمینه برابره شي.”