د دید خبري اژانس: د افغانستان د زیربناوو د ښه کولو لپاره د سیمه ایزې همکارۍ په دوام، د بریښنا شرکت د ازبکستان د انرژۍ وزارت سره د بریښنا د لیږد او ویش څلور لوی قراردادونه لاسلیک کړل.
د بریښنا شرکت اعلان وکړ چې د ازبکستان د انرژۍ وزارت سره په یوه نوي تړون کې، په افغانستان کې د بریښنا د لیږد او ویش څلور لوی پروژې پلي کیږي.
پدې تړون کې د لیږد لینونه او سټیشنونه شامل دي چې د هیواد د ۱۱ ولایتونو لپاره اړین بریښنا به چمتو کړي، پشمول د کابل، کندهار، بغلان، ننګرهار، لغمان، لوګر، خوست، پکتیا، پکتیکا، غزني او زابل.
د دې پروژو ترټولو مهمه برخه د ۵۰۰ کیلو ولټ “سرخان-دشت-الوان” لاین او د دشت-الوان سټیشن پراختیا ده. همدارنګه، د کابل-ننګرهار ۲۲۰ کیلو ولټ لاین او په ننګرهار کې د شیخ مصري سټیشن د دې تړون نورې برخې دي.
د برېښنا شرکت د چارواکو په وینا، د دې پروژو په پلي کولو سره به د کابل د برېښنا ظرفیت شاوخوا ۱۵۰۰ میګاواټو ته ورسیږي، چې دا شمېره کولی شي په پلازمینه او د افغانستان په جنوبي او ختیځو سیمو کې د برېښنا د کمښت ستونزې په جزوي ډول کمې کړي.