د دید خبري اژانس: د طالبانو د سرپرست حکومت لومړي وزیر د چین د بهرنیو چارو له وزیر او د هغه له ملګري پلاوي سره ولیدل، چې د افغانستان، چین او پاکستان د بهرنیو چارو وزیرانو په درې اړخیزه غونډه کې د ګډون لپاره کابل ته راغلي دي، او د دواړو هېوادونو ترمنځ د همکارۍ او سیمه ییزو پرمختګونو په اړه یې خبرې وکړې.
نن ماسپښین، د سرپرست حکومت لومړي وزیر ملا محمد حسن آخند د چین د بهرنیو چارو له وزیر وانګ يي سره ولیدل.
دا غونډه د افغانستان، چین او پاکستان د بهرنیو چارو وزیرانو د درې اړخیزې غونډې په څنډه کې ترسره شوه.
د غونډې په جریان کې، لومړي وزیر په نړیوالو فورمونو کې د افغانستان لپاره د چین د ملاتړ ستاینه وکړه او په نړیوال ډګر کې د افغانستان د دریځ د پیاوړتیا لپاره یې له بیجینګ سره د دوامداره همکارۍ غوښتنه وکړه.
هغه دا هم ټینګار وکړ چې سرپرست حکومت به اجازه ورنکړي چې د هیواد خاوره د نورو هېوادونو پر وړاندې د اقداماتو لپاره وکارول شي او د سیمې له هېوادونو یې وغوښتل چې د دوستۍ او رغنده همکارۍ پر بنسټ اړیکې تعقیب کړي.
د چین د بهرنیو چارو وزیر وانګ یی د دواړو هېوادونو ترمنځ د اوږدمهاله اړیکو ته په اشارې سره، افغانستان او چین “ښه ملګري” وبلل او د افغانانو خپلواکۍ او ارادې ته یې د درناوي په څرګندولو سره، په امنیتي او اقتصادي برخو کې د همکارۍ لپاره د خپل هیواد چمتووالی اعلان کړ.
هغه دا هیله هم څرګنده کړه چې په سیمه کې د چین امنیتي اندیښنې به حل شي ترڅو د افغانستان دوامداره او نور پرمختګ ته لاره هواره شي.