پاکستان: په افغانستان کې ترهګري د ملي امنیت لپاره تر ټولو لوی ګواښ دی
د دید خبري اژانس: د پاکستان مرستیال لومړي وزیر او بهرنیو چارو وزیر په یوه بیان کې ټینګار وکړ چې د افغانستان له خاورې څخه ترهګري د پاکستان د ملي امنیت لپاره تر ټولو لوی ګواښ دی.
د پاکستان مرستیال لومړي وزیر او بهرنیو چارو وزیر محمد اسحاق ډار په یوه مطبوعاتي کنفرانس کې وویل چې د افغانستان له خاورې څخه د ترهګرۍ ګواښ یو حقیقت دی او د پاکستان د امنیت لپاره تر ټولو لوی خطر ګڼل کیږي.
هغه ټینګار وکړ چې اسلام آباد یو باثباته، جامع او خپلواک افغانستان غواړي او یوازې تمه لري چې د هیواد خاوره به د پاکستان په ګډون د هیڅ هیواد په وړاندې د ترهګریزو کړنو لپاره ونه کارول شي.
اسحاق ډار د ټرانس-افغان ریل پټلۍ پروژه هم د پاکستان او افغانستان ترمنځ د ګډې همکارۍ د مثال په توګه معرفي کړه، د دواړو هیوادونو ترمنځ تاریخي او کلتوري اړیکو ته یې اشاره وکړه.
هغه ټینګار وکړ چې اقتصادي او زیربنایي همکاري کولی شي د دوه اړخیزو اړیکو پیاوړتیا او د ترهګرۍ سره مبارزه کې مرسته وکړي.