د دید خبری اژانس: د شمالي کوریا مشر کیم جونګ اون د خپل هیواد له پوځي ځواکونو څخه غوښتي چې په هره شیبه کې د “حقیقي جګړې” لپاره چمتو وي. د فرانسې ۲۴ په وینا، دا څرګندونې وروسته له هغه وشوې چې ځینو سرچینو راپور ورکړ چې د شمالي کوریا پوځي ځواکونه او تجهیزات په اوکراین کې د جګړې د مرستې لپاره روسیې ته لیږل شوي او ځای پر ځای شوي دي.
د شمالي کوریا مرکزي تلویزیون د پنجشنبې په ورځ د پوځ د توپخانې واحدونو لخوا د پوځي تمرینونو انځورونه خپاره کړل چې پکې سرتیري د سمندر په لور ډزې کوي.
د تمرین څخه د لیدنې پرمهال، کیم ټینګار وکړ چې وسله وال ځواکونه باید “هر وخت د جګړې لپاره چمتو وي” او د “په هره شخړه کې دښمن له منځه وړلو” وړتیا ولري.
له بلې خوا، د سویلي کوریا او لویدیځو هیوادونو استخباراتي راپورونه ښیي چې پیونګ یانګ په تیر کال کې د روسیې د کرسک سیمې ته له ۱۰،۰۰۰ څخه ډیر سرتیري لیږلي دي، د توپخانې، توغندیو او اوږد واټن ویشتونکو توغندیو سیسټمونو سره. سیول ادعا کوي چې د دې پوځي همکارۍ په جریان کې شاوخوا ۶۰۰ کوریايي سرتیري وژل شوي او زرګونه نور ټپیان شوي دي.