یونېسکو او د ملګرو ملتونو د افغان ښځو په اړه جلا جلا غونډې جوړوي
دید خبرې آژانس: د مارچ د اتمې د رارسېدو په درشل کې یونېسکو او د ملګرو ملتونو د ښځو څانګه به د افغان ښځو په تړاو دوه جلا جلا غونډې جوړې کړي.
د مارچ د اتمې یا د ښځو د نړیوالې ورځې په درشل کې د ملګرو ملتونو علمي، کلتوري او ښوونیزسازمان (یونسکو) اعلان کړی چې د ۲۰۲۵ کال د مارچ پر ۷مه به د افغان ښځو او نجونو وضعیت ته د نړیوالې ټولنې د پام را اړولو په موخه یو کنفرانس جوړ کړي.
د دغه کنفرانس موخه د نړیوال پوهاوي لوړول او د افغان ښځو له حقونو دفاع ده، په تېره بیا په داسې شرایطو کې چې د یونسکو په باور د افغان ښځو ازادۍ او زده کړو ته لاسرسی محدود شوی دی.
یونېسکو ویلي: «د یونسکو د لوړې کچې کنفرانس چې د ۲۰۲۵ کال د مارچ پر ۷مه د جمعې په ورځ جوړېږي، پر هغو دوامدارو او پراخو ننګونو تمرکز کوي چې افغان ښځې او نجونې ورسره مخ دي. د دغه کنفرانس موخه د نړیوال پوهاوي لوړول او په داسې شرایطو کې د ښځو د حقونو ملاتړ دی، چې د هغوی ازادۍ او زده کړو ته لاسرسی سخت محدود شوی دی.»
د ښځو د حقونو فعاله، تفسیر سیاه پوش بیا وايي: هیله ده چې پایلې ورکړي. او په لومړي قدم کې زموږ غوښتنه له اسلامي امارته دا ده چې پام وکړي او د ښوونځيو دروازې پرانیزي او محدودیتونه راکم کړي.
پخوانی ډيپلوماټ، عزیز معارج هم وايي: د ښځو هغو حقونو ته چې په اسلام کې دي او انساني ټولنه کې دي، باید درناوی ورته وشي. تر دې پرته د انساني ټولنې دوام ممکن نه دی.
له دغه کنفرانس سره هممهاله، د ملګرو ملتونو د ښځو څانګې هم اعلان کړی چې د ۲۰۲۵ کال د مارچ پر ۱۳مه به د افغان ښځو په ګډون سره یوه غونډه جوړه کړي.
دغه بنسټ زیاته کړې چې په دې غونډه کې به له افغان ښځو سره تعاملي بحثونه وشي او د «امر بالمعروف او نهي عن المنکر وزارت» د قوانینو په تړاو به هم یو راپور هم وړاندې شي.
د ملګرو ملتونو د ښځو څانګه وايي: «د دغو بحثونو موخه د افغان ښځو د غږ پیاوړی کول دي، څو ډاډ ترلاسه شي چې دوی نه یوازې د ښځو د مسایلو په تړاو خبرې کوي، بلکې د هغو پالیسیو د جوړولو په بهیر کې هم فعال مشارکت لري چې پر ژوند یې اغېز لري.»
که څه هم د افغانستان اسلامي امارت تر دې مهاله د دغو غونډو په تړاو رسمي دریځ نه دی څرګند کړی، خو تل یې ټینګار کړی چې د ښځو حقوق به د اسلامي احکامو په اډانه کې خوندي شي.
