ګوترش: امنیتي پېښې ۱۶.۸ سلنې په افغانستان کې کمې شوي
دید خبرې آژانس: د ملګرو ملتونو لوی منشي د افغانستان په تړاو په خپل راپور کې په سیاسي او امنیتي چارو کې پرمختګونه، سیمه ییزې همکارۍ، بشري حقونه او اقتصادي مسایل ارزولي دي.
د ملګرو ملتونو سرمنشي انتونیو ګوترېش په خپل تازه درې میاشتني راپور کې چې د ۲۰۲۴ کال له نومبره د ۲۰۲۵ کال تر جنورۍ پورې مودې ته پکې کتنه شوې، ویلي چې په دې موده کې د امنیت ضد پېښو کچه د تېر کال د همدې مودې پرتله ۱۶.۸ سلنه کمه شوې ده.
د ملګرو ملتونو د سرمنشي درې میاشتنی راپور وايي: «د ۲۰۲۴ کال د نومبر له لومړۍ د ۲۰۲۵ کال د جنورۍ تر ۳۱مې ملګرو ملتونو ۲۰۸۱ امنیتي پېښې ثبت کړې چې د تېر کال د ورته مودې پرتله ۱۶.۸ سلنه کموالی ښيي.»
ایمل دوستیار وايي: نړۍ ته باید حقایق وړاندې شي چې افغانستان یو امن هېواد دی. اوس ټول هېوادونه په انفرادي شکل که هم وي، را دې شي او افغانستان دې له نږدې و ویني.
د ملګرو ملتونو سرمنشي په دغه راپور کې پر امنیتي مسایلو سربېره، پر حکومتولۍ، سیاسي پرمختګونو، سیمه ییزو همکاریو، بشري حقونو، اقتصادي مسایلو او د کډوالو وضعیت هم تمرکز کړی دی.
د راپور لمخې، په تېرو درېیو میاشتو کې له ایران او پاکستانه څه باندې ۳۵۰ زره افغان کډوال بېرته هېواد ته راستانه شوي. د ملګرو ملتونو د اټکل له مخې، د ۲۰۲۴ کال د اکټوبر له ۲۲مې د ۲۰۲۵ کال د جنورۍ تر ۷مې پورې ۳۵۶ زره افغانان بېرته خپل هېواد ته راستانه شوي دي.
د ملګرو ملتونو د سرمنشي درې میاشتنی راپور زیاتوي:«اټکل کېږي چې د ۲۰۲۴ کال د اکټوبر له ۲۲مې د ۲۰۲۵ کال د جنورۍ تر۷مې پورې ۳۵۶ زره افغانان افغانستان ته راستانه شوي، له هغو کسانو پرته چې د ویزې لرونکي معتبر پاسپورټونه لري. له دې شمېرې ۵۹ زره له پاکستان او ۲۹۷ زره له ایرانه راستانه شوي دي.»
که څه هم اسلامي امارت د دغه راپور په تړاو رسمي غبرګون نه دی ښودلی، خو تر دې وړاندې یې په ټوله افغانستان کې د امنیت د ټينګښت ډاډ ورکړی.
نجیب الرحمن شمال بیا وايي: د اوسني حکومت سرپرست چارواکي باید د سیمې له هېوادونو سره په ګډه همغږي و لري. د ترهګرو د لارې په اړه چې له افغانستانه ورځي هغوی باید وېښ وي او سرپرست حکومت هم ژمن وي چې له دې لارې ورته ګواښ پېښ نه شي.
په دغه راپور کې دغه راز د امنیت شورا ۲۷۲۱ پرېکړه لیک پر بنسټ داسې سوله ییز افغانسان ته د ملګرو ملتونو پر ژمنتیا ټینګار شوی چې هم له ځان او هم له خپلو ګاونډيو سره په سوله کې وي.
دا راپورونه په منظم ډول په هرو دریو میاشتو کې د ملګرو ملتونو د سرمنشي لخوا امنیت شورا ته وړاندې کیږي.
