دید خبرې آژانس: د کندهار ولایت د کرنې، اوبولګولو او مالدارۍ ریاست مسوولین وایي چې په دغه ولایت کې د ۲۵۰ زره امریکایي ډالرو په لګښت د زراعتي محصولاتو د کیفیت تشخیص یو معیاري لابراتوار جوړ او ګټې اخیستنې ته سپارل شوی دی.

د یاد ریاست مطبوعاتي مسوول محمد حنیف حقمل ویلي چې دغه لابراتوار د سوداګرۍ او پانګونې خونې د خصوصي سکټور په مالي ملاتړ د سبو، میوو، حبوباتو او نورو زراعتي محصولاتو د کیفیت د لابراتواري ارزونې په موخه جوړ شوی دی.
نوموړي زیاته کړه، چې دا معیاري لابراتوار د ۹ میاشتو په موده کې جوړ شوی او ورسره به کروندګر، سوداګر او د زراعت اړوند بنسټونه وکولای شي د خپلو محصولاتو کیفیت د علمي وسایلو له لارې وڅېړي او په ملي او نړیوالو بازارونو کې یې سیالۍ ته چمتو کړي.
مسوولین وایي، چې دا لابراتوار به نه یوازې د کروندګرو او سوداګرو اړتیاوې پوره کړي، بلکې د کرنیزو محصولاتو صادراتو ته هم وده ورکړي او د زراعتي سکټور په معیاري کولو کې مهم ګام وي.