کندهار کې د کورنیو تولیداتو او لاسي صنایعو درې ورځنې نندارتون
دید خبرې آژانس: په کندهار ولایت کې نندارتون جوړونکي وایي موخه یې په کور دننه تولیداتو ته بازار موندل او وده ورکول دي.
دا نندارتون د افغانستان صنعت او سوداګرۍ وزارت تر لارښوونې لاندې، د کانونو او صنعت، سوداګرۍ او پانګونې خونو، د سیکارام احمدي بازار موندنې شرکت اودغه راز د ملګرو ملتونو کډوالو ادارې له لورې جوړ شوی دی.
د سیکارام احمدي بازار موندنې شرکت اجرایوي مشر مسعود حقمل وایي په دې نندارتون کې چې ددرې ورځو لپاره به دوام وکړي د کورنیو تولیداتو د نندارې لپاره یوسلو پنځوس غرفې ایښودل شوي دي چې په کور دننه تولیداتو سربیره پکې ځینې بهرني تولیدات هم موجودي.
مسعود حقمل وایي دا نندارتون د نورو ولایتونو له نندارتونو سره ځکه په توپیر کې دی چې په دې نندارتون کې د کندهار وچو میوو ته چې په نړیواله کچه ځانګړی نوم لري ډیره پاملرنه شویده.
د سیکارام احمدي بازار موندنې شرکت اجرایوي مشر وایي دا نندارتونونه د کورنیو تولیداتو لپاره په کور دننه او بهر د بازار موندلو تر ټولو ښه وسیله ګڼل کیږي.
د دې نندارتون د پرانستې په مراسمو کې د افغانستان د کانونو او صنعت خونې مشر شیرباز کمین زاده په خپلو خبرو کې وویل دا ډول نندارتونونو جوړول وپه کور دننه له هیواده د باندې هم د وطني تولیداتو د پلور پر بازار مثبته اغیزه کوي .
نوموړي وویل اوسمهال افغانستان په ۱۳۷ تولیدي سکتورونو کې پر ځان بسیا او پر خپلو پښو ولاړ دی.
د کندهار ولایت سوداګرۍ او پانګونې خونې مرستیال انجنیرعبدالباقي بینا بیا دا ډول نندارتونونه د اړیکو ټینګولوتر ټولو ښه وسیله وبلله ویې ویل سوداګر، او تولیدونکي یو له بل سره ویني او اړیکي جوړوي.
د دې نندارتون یو برخه وال عطا محمد وایي په کور دننه دښه کیفیت لرونکي تولیدات ترسره کیږي خو ډیری خلک ترې ناخبره دي چې دا ډول نندارتونونه د خلکو دخبراوي لپاره هم ګټور دي.
زلمی بهادري ددې نندارتون بل برخه وال دی او هغه وایي دا ډول نندارتونونه باید په دوامداره توګه جوړ شي.
د نوموړي پر وینا د حکومت او خصوصي سکتور ګډه همکاري په دې برخه کې ډیره اړینه ده.
د کندهار له دې نندارتون خواوشاه یوه میاشت وړاندې ورته نندارتون په ختیځ ښار جلال اباد کې هم جوړ شوی و.
