دید خبرې آژانس: د خبريال ملي ورځ په پلازمېنه کابل کې د افغانستان د خبريالانو ملي کور له لوري د يو شمېر رسنيو د مسوولينو، خبريالانو او پوهنتونونو د استادانو په شتون کې د يوې غونډې په ترڅ کې ونمانځل شوه.
د ياد مرکز رئيس سيد ياسين متين په دغه غونډه کې وويل چې د افغان خبریالانو ملاتړ او د هغوی د ستونزو د حل په موخه به خپلو هڅو ته دوام ورکړي.
نوموړي همدارنګه اطلاعاتو ته د لاسرسي په برخه د حکومت د لا ډیرې پاملرنې غوښتنه وکړه.
هغه زياته کړه، چې د رسنيو نړيوال ملاتړو بنسټونو لکه څنګه، چې لازمه وه هماغه ډول خپل مسوولیتونه نه دی ادا کړی.
په ورته وخت کې د رڼا پوهنتون استاد ارشاد عظيمي په دغه غونډه کې وويل چې رسنۍ د اطلاع رسونې تر څنګ د محيط او ټولنې په څارنه او د افکارو په مثبت تغیر او نظم کې ډېر مهم رول لوبوي.
هغه زياته کړه، په هېواد کې د خبريالانو مسلکي توب ته باید جدي پاملرنه وشي، څو اطلاعات په کره، معياري او ښه ډول خلکو ته ورسول شي.
د غونډې نورو ويناوالو د اطلاعاتو او کلتور له وزارت څخه غوښتنه وکړه، چې د هغو بنسټونو مخنيوی وکړي، چې د پيسو ګټلو په موخه د خبريالۍ لنډمهاله کورسونه دايروي او د خبريالانو په نوم رسنيز ډګر ته غير مسلکي کسان وړاندې کوي.
د يادونې وړ ده، چې د دغه غونډې په پای کې د باختر اطلاعاتي اژانس د دوو خبريالانو په ګډون يو شمېر خبريالان او د رسنيو استازي په ستاينليکونو ونازول شول.
